फाइनलमा माहिका र अभिलाषा भिड्ने

काठमाडौं ।  माहिका राणा नवौं सिटिजन्स बैंक खुला टेनिस प्रतियोगित।को महिला सिंगल्समा आइतबार फाइनलमा प्रवेश गरेकी छन् ।

सिटिजन्स बैंकको मुख्य प्रायोजनमा काठमाडौं जिल्ला टेनिस संघद्वारा आयोजित प्रतियोगिताको दोश्रो सेमिफाइनलमा माहिकाले सुनिरा थापालाई ६–० र ७–६ (५) ले पराजित गरिन् ।

फाइनलमा माहिकाको भेट राष्ट्रिय च्याम्पियन अभिलाषा विष्टसंग हुनेछ । पहिलो सेमिफाइनलमा अभिलाषाले आइशा डोल्कर गुरुङलाई ६–० र ६–४ को सोझो सेटमा हराउदै फाइनलमा स्थान सुरक्षित गरिसकेकी छन् ।

पुरुष सिंगल्सको फाइनल अभिषेक बाँस्तोल र ऋतिक राणाबीच हुनेछ ।

भेट्रान ३५ वर्षमाथि पुरुष सिंगल्स फाइनलमा कमलबहादुर भण्डारीले पूर्व च्याम्पियन जितेन्द्र परियारलाई ७–६  (५) र ६–१ ले हराउदै पहिलो भए । सो स्पर्धाको डबल्समा जितेन्द्र परियार र सुवर्ण धाक्वको जोडी पहिलो भए । उक्त जोडीले फाइनलमा सन्तोष खत्री र दावा सोनाम शेर्पालाई २–६, ६–३ र १०–४ ले पाखा लगाए ।

६५ वर्षमाथि पुरुष सिंगल्समा कमल थापाले विदुर विष्टलाई ४–१ र ४–१ को सोझो सेटमा पन्छ्यादै स्वर्ण जिते ।