टिकटबाट उठेको रकम क्यानको खेलाडी कल्याण कोषलाई हस्तान्तरण

काठमाडौं ।  एमडीएसी स्पोर्ट्सले सहिद स्मारक 'ए' डिभिजन लिग अन्तर्गत मनाङ मर्स्याङ्दी क्लब र एपीएफ क्लबबीचको खेलमा टिकटमार्फत उठेको रकम नेपाल क्रिकेट संघ (क्यान) को खेलाडी कल्याण कोषलाई हस्तान्तरण गरेको छ ।    

'ए' डिभिजन लिगको मार्केटिङ कम्पनी एमडीएसीले आइतबार गत चैत ४ गते भएको खेलमा उठेको १ लाख ४८ हजार ८ सय रुपैयाँ कोषलाई हस्तान्तरण गरिएको जनाएको छ ।

उक्त खेलमा सामान्य प्यारापिटतर्फ १ लाख १२ हजार २ सय र भीआईपीतर्फ ३६ हजार ६ सय रुपैयाँ उठेको जनाएको छ।

एमडीएसी स्पोर्ट्सले खेल अघि राष्ट्रिय क्रिकेट टिमका खेलाडीलाई सम्मान समेत गरेको थियो ।   

आईसीसी विश्वकप क्रिकेट लिग टू मा उत्कृष्ट प्रदर्शन गर्दै विश्वकप छनोटमा सोझै छनोट भएको भन्दै क्रिकेट टिमलाई सम्मान गरिएको हो ।