काठमाडौं । त्रिभुवन आर्मी क्लबका नासिर याह्या हुसेनले नवौं राष्ट्रिय खेलकुद अन्तर्गत पौडीको पुरुष २०० मिटर इन्डिभिजुअल मिड्लेमा राष्ट्रिय कीर्तिमान बनाएका छन् ।
पोखराको फिस्टेल एकेडेमीमा आइतबार २ मिनेट ११.०४ सेकेन्डको समय निकाल्दै नासिरले राष्ट्रिय कीर्तिमानसहित स्वर्ण पदक जितेका हुन् ।
यस अघि उनकै नाममा २ मिनेट ११.८५ सेकेन्डको कीर्तिमान रहेको थियो ।
यस स्पर्धामा एनआरएनएका आशिष सापकोटाले २ मिनेट १३.९८ सेकेन्डको समय निकाल्दै रजत हात पारे ।
बागमती प्रदेशका सौरेन सिंहले २ मिनेट १९.९१ सेकेन्डको समय निकाल्दै कास्य जिते ।
यस्तै नासिरले पुरुष २०० मिटर फ्री स्टाइलमा समेत राष्ट्रिय कीर्तिमान सहित स्वर्ण पदक हात पारे ।
उनले १ मिनेट ५५.३९ सेकेन्डको समय निकाल्दै राष्ट्रिय कीर्तिमान बनाएका हुन् ।
यस स्पर्धामा आर्मीकै एलेक्स शाहले १ मिनेट ५५.४८ सेकेन्डसहित रजत जिते ।
यस्तै २ मिनेट ०२.७५ सेकेन्डको समय निकाल्दै इर्भिन श्रेष्ठले कास्य जिते ।
