महिलाको एकदिवसीय क्रिकेट प्रतियोगिताको तयारीमा क्यान

काठमाडौं । नेपाल क्रिकेट संघ(क्यान) महिलाको एकदिवसीय राष्ट्रिय क्रिकेट प्रतियोगिता गराउने तयारीमा जुटेको छ ।

क्यानका कार्यवाहक सचिव प्रशान्त विक्रम मल्लले महिलाको एकदिवसीय प्रतियोगिता आयोजनाका लागि अन्तिम तयारी भईरहेको बताए ।

अन्तराष्ट्रिय क्रिकेट परिषद्(आईसीसी) नेपाली महिला टोलीलाई आगामी वर्ष एकदिवसीय अन्तराष्ट्रिय मान्यता दिने संकेत बुझेपछि क्यान एकदिवसीय राष्ट्रिय प्रतियोगिता गर्ने तयारीमा रहेको हो ।

'हामी निर्वाचित भएर आएपछि नै हामी महिला एकदिवसीय क्रिकेट गराउन तयारीमा थियौ,' मल्लले खेलपाटीसँग भने 'तर,विभिन्न कारणवंश त्यो हुन सकेको थिएन । आगामी वर्ष नेपाली महिला क्रिकेट टिमले एकदिवसीय मान्यता पाउने संकेत हामीले आईसीसीबाट पाएकाले हामी राष्ट्रिय एकदिवसीय क्रिकेटको अन्तिम तयारीमा रहेका छौँ ।'

आईसीसीले यस वर्ष नेदरल्याण्ड्स,थाईल्याण्ड,पपुवा न्युगिनी,स्कटल्याण्ड तथा अमेरिकालाई एकदिवसीय अन्तराष्ट्रियको मान्यता दिएको थियो ।