भलिबल संघमा ९ उपाध्यक्षको प्रस्ताव !

काठमाडौं । नेपाल भलिबल संघमा ९ उपाध्यक्ष रहने गरि विधान संशोधन गरिएको छ । 

संघले गठन गरेको विधान संशोधन समितिले सातै प्रदेशको प्रतिनिधित्व हुने गरि ७ उपाध्यक्ष र दुई मनोनितको व्यवस्था सहित ९ उपाध्यक्ष रहने गरि विधान संशोधन गरेको हो । 

मंगलबार काठमाडौंमा बसेको संघको पूर्ण बोर्ड बैठकले संशोधित विधानलाई पारित गरेको छ । संशोधित विधान कार्यान्वयनमा आउन संघको साधारण सभाले पारित गर्नुपर्नेछ । संघको वर्तमान विधानमा ५ उपाध्यक्ष निर्वाचनबाट आउने र दुई जनालाई अध्यक्षले मनोनित गर्न पाउने व्यवस्था छ । संघको संशोधित विधान अनुसार संघको नयाँ कार्यसमिति ४१ सदस्यीय बन्नेछ । 

संघको वर्तमान कार्यसमिति ३९ सदस्यीय रहेको छ । जसमा अध्यक्ष सहित ७ उपाध्यक्ष, एक महासचिव, ७ सचिव, एक कोषाध्यक्ष र २२ सदस्य सहित ३९ सदस्यीय कार्यसमितिको व्यवस्था छ । 

संघले विधान संशोधनका लागि पूर्व उपाध्यक्ष गंगाबहादुर थापा मगरको संयोजकत्वमा समिति गठन गरेको थियो । 
विधान समितिले संघको साधारण सभामा खेलाडीको प्रतिनिधित्व हुने गरि पूर्व अन्तराष्ट्रिय खेलाडीबाट एक पुरुष र एक महिलालाई साधारण सभामा सहभागी गराउने व्यवस्था गरेको छ ।

यस्तै, नगर भलिबल संघ गठनका लागि महानगर र उपमहानगरमा १३ सदस्यीय कार्यसमिति रहने र नगरपालिका र गाउँपालिकामा ११ सदस्यीय कार्यसमिति रहने गरि विधानमा व्यवस्था गरिएको छ । जसमा दुई जना सदस्य सम्बन्धित पालिकाबाट रहनेछन् । 

राष्ट्रिय खेलकुद परिषद् (राखेप)ले विधानका केही बुँदा संशोधनका लागि निर्देशन दिएपछि संघले मंगलबार पूर्ण बोर्ड बैठक राखेको थियो । बैठकले विधान संशोधन समितिको प्रस्तावलाई सर्वसम्मत रुपमा पारित गरेको छ र साधारण सभामा लैजाने निर्णय गरेको छ । 

भलिबल संघको केन्द्रिय निर्वाचन सहितको साधारण सभा भदौ २२ गते काठमाडौंमा हुदैछ । संघको नयाँ नेतृत्वका लागि वर्तमान उपाध्यक्ष निरोज मास्केले अध्यक्ष पदमा उम्मेदवारीको औपचारिक घोषणा गरिसकेकी छिन् ।