बलियो नेपाल यू-१५ क्रिकेट : प्रदेश १ र बागमतीको जित

काठमाडौं ।  बलियो नेपाल न्युट्रिसन इनिसिएटिभको आयोजना तथा क्विन्स इभेन्ट मेनेजमेन्टको व्यवस्थापनमा मंगलबारबाट बलियो नेपाल यू-१५ क्रिकेट प्रतियोगिता सुरु भएको छ ।

मुलपानी मैदानमा सुरु भएको प्रतियोगिताको पहिलो दिन बलियो प्रदेश १ र बलियो बागमती प्रदेशले जित हात पारेका छन्।

पहिलो खेलमा बलियो प्रदेश १ ले बलियो गण्डकी प्रदेशलाई ४ विकेटले पराजित गर्यो । वर्षाका कारण १२ ओभरमा छोट्याइएको खेलमा टस हारेर पहिले ब्याटिङ गरेको बलियो गण्डकी प्रदेशले ४१ रन मात्र जोड्न सक्यो ।

गण्डकी प्रदेशलाई सस्तैमा समेट्ने क्रममा बलियो प्रदेश १ का कृतिक कामतले ४ विकेट हात पारे । जवाफमा ४२ रनको लक्ष्य बलियो प्रदेश १ ले १०.५ ओभरमा ६ विकेट गुमाएर पुरा गर्यो ।

यस्तै दिनको दोस्रो खेलमा बलियो बागमती प्रदेशले बलियो ११ माथि २२ रनको जित दर्ता गर्यो । १२ ओभरमा छोट्याइएको खेलमा टस जितेर ब्याटिङ्ग रोजेको बलियो बागमती प्रदेशले ६ विकेट गुमाएर १३५ रन जोडेको थियो । उसका लागि आकाश खत्रीले ३२ बलमा ५१ रन जोडे । बलियो ११ का जेनिश पुन मगरले सर्वाधिक ३ विकेट आफ्नो नाम गरे ।

जवाफमा १३६ रनको लक्ष्य पछ्याएको बलियो ११ ले १४.४ ओभरमा सबै विकेट गुमाउनु अगि ११३ रन मात्र जोड्न सक्यो । बलियो ११ का पारस अएरले ४३ रन बनाउन बाहेक अन्य ब्याट्स्म्यानले उल्लेखनिय योगदान गर्न सकेनन । बलियो बागमतीका रोमन विष्टले ४ विकेट प्राप्त गरे ।

प्रतियोगिताको उद्घाटन पूर्व कप्तान पारस खड्काले ब्याटिङ , बलियो नेपाल न्युट्रिसन इनिसिएटिभका प्रमुख कार्यकारी अधिकृत डा. अतुल उपाध्यायले ब्याटिङ र बागमती प्रदेश क्रिकेट संघका अध्यक्ष राजु बस्न्यातले विकेट किपिङ गर्दै गरेका थिए ।