मलेसिया जाने महिला क्रिकेट टिमको बिदाइ

काठमाडौं । नेपाल क्रिकेट संघ (क्यान) ले मलेसियामा आयोजना हुने एसीसी महिला टी-ट्वान्टी च्याम्पियनसिप खेल्ने नेपाली राष्ट्रिय महिला क्रिकेट टोलीलाई बिदाइ गरेको छ ।

क्यानले मंगलबार मलेसिया जाने महिला टोलीलाई बिदाइ गरेको हो । राष्ट्रिय खेलकुद परिषद (राखेप) का सदस्य सचिव टंक लाल घिसिङ, क्यानका कार्यबाहक सचिव प्रशान्त बिक्रम मल्ल लगायत क्यानका पदाधिकारीले महिला टोलीलाई बिदाइ गरे ।

च्याम्पियनसिपका लागि क्यानले सोमबार रुबिना क्षेत्रीको कप्तानीमा १५ सदस्यीय महिला टिमको घोषणा गरिसकेको छ ।

च्याम्पियनसिप यहिँ जुन १७ बाट सुरु हुनेछ । च्याम्पियनसिपमा नेपाल समूह 'बी' मा रहेको छ । नेपालको समूहमा हङकङ, कुवेत, भुटान र बहराइन रहेका छन् ।

यस्तै समूह 'ए' मा मलेसिया, युएई,ओमान,कतार र सिंगापुर रहेका छन् ।

नेपालले भुटानसँग खेल्दै च्याम्पियनसिपको सुरुआत गर्नेछ । खेल जुन १७ मा हुनेछ।

यस्तै नेपालले दोस्रो खेलमा जुन १८ मा कुवेतसँग खेल्नेछ ।

नेपालले जुन २० मा बहराइन र जुन २१ मा हङकङसँग खेल्नेछ ।

समूह चरणको खेलपछि शीर्ष दुई टोलीले सेमिफाइनलमा स्थान बनाउने छन् ।

च्याम्पियनसिपको फाइनल पुग्ने दुई टोलीले महिला टी-ट्वान्टी एसिया कप क्रिकेटमा छनोट हुनेछ ।

नेपाली टोली -

रुविना क्षेत्री, इन्दु वर्मा, सिता रानामगर, ज्योती पाण्डे, काजल श्रेष्ठ, कविता कुँवर, अपसरी बेगम, कबिता जोशी, डोली भट्ट, सबनम राई, संगिता राई, अस्मिता कर्मचार्य, मनिषा उपाध्याय, विन्दु रावल, ममता चौधरी