यू–२० को बन्द प्रशिक्षणमा बागमती युथका ५ खेलाडी 

काठमाडौं । नेपालको यू–२० राष्ट्रिय फुटबल टिमको प्रारम्भिक बन्द प्रशिक्षणमा मोफसलको क्लब बागमती युथबाट ५ खेलाडी छनोट भएका छन् ।

अखिल नेपाल फुटबल संघ (एन्फा)ले साफ र एएफसी छनोट खेल्नका लागि तयार पारेको प्रारम्भिक टिममा सर्लाहीको बागमती युथका ५ खेलाडी परेका हुन् ।

एन्फाले शनिबार यू–२० राष्ट्रिय टिमका लागि प्रारम्भिक ४० खेलाडीको छनोट गरेका थियो । मुख्य प्रशिक्षक मेघराज केसीले देशभरबाट छनोट गरेको प्रारम्भिक टिममा मोफसलको एउटै क्लबका ५ खेलाडी परेका हुन् । 

बागमती युथबाट प्रितम स्याङ्तान, अमर श्रेष्ठ, अभिषेक वाइबा, दिपेश राई र क्षितिज भण्डारीले बन्द प्रशिक्षणमा स्थान बनाएका छन् ।

सर्लाहीबाट राकेश विक समेत बन्द प्रशिक्षणमा परेका छन्, तर उनी बागमती युथ क्लबका हैनन् । सर्लाही जिल्लाको बागमती युथ राष्ट्रिय स्तरका खेलाडी उत्पादन र प्रबद्र्धन गर्ने क्लबको रुपमा परिचित छ ।

खेलाडीलाई निरन्तर मासिक तलब दिएर राख्ने र एक्सपोजर दिने क्लबको रुपमा बागमतीले चर्चा कमाएको छ । 

यसअघि एन्फाकै यू–१३ छनोटमा बागमती युथ क्लबका ७ जना खेलाडी परेका थिए । खेलाडीलाई निरन्तर अभ्यासमा राखेर, आर्थिक रुपमा सबल बनाउँदै बागमती युथले मोफसलका प्रतिष्ठित प्रतियोगिता खेल्दै आएको छ । 

चार वर्षअघि प्रशिक्षकको रुपमा क्लबको जिम्मेवारी लिएका रोजित केसीले खेलाडीलाई प्रशिक्षण दिदै आएका छन् । उनकै प्रशिक्षणमा यू–१३ र यू–२० राष्ट्रिय छनोटमा बागमती क्लबले ठुलो सफलता हासिल गरेको छ । मोफसलका बसेर खेलाडी उत्पादनमा उत्कृष्ट कार्य गरेवापत एन्फाले केसीलाई यू–२३ राष्ट्रिय टिमको सहायक प्रशिक्षकको जिम्मेवारी पनि दिएको थियो । 

राष्ट्रिय स्तरका खेलाडी उत्पादनमा योगदान गर्दै आएको क्लबलाई बागमती नगरपालिका र यसका मेयर भरतकुमार थापाले मुख्य रुपमा सहयोग गर्दै आएका छन् । नगरपालिका र मेयरकै पुर्ण सहयोगमा क्लबले पुरुष टिम, महिला टिम र युथ एकेडेमी सञ्चालन गर्दै खेलाडीलाई जिविकोपार्जनका लागि मासिक तलब दिदै आएको छ । नगरपालिकाकै सहयोगमा क्लबले मोफसलको प्रतिष्ठित फुटबल प्रतियोगिता राजर्षी जनक गोल्डकप आयोजना गर्दै आएको छ ।