ज्ञान टाइगरलाई उपाधि

काठमाडौं । ज्ञान टाइगरले पाठशाला कप एसइइ छात्र नकआउट बास्केटबल प्रतियोगिताको उपाधि आइतबार जितेको छ ।

बानेश्वरस्थित आयोजक पाठशाला नेपाल फाउन्डेसनको कोर्टमा भएको फाइनलमा ज्ञान टाइगरले संस्कृतिलाई ५२–२२ ले सहजै पराजित गर्यो । ज्ञान टाइगरका धनराज सरु मगरले सर्वाधिक २० अंक जोडे । धनराज ‘मोस्ट भेलुएबल प्लेयर’ घोषित भए ।

पहिलो क्वाटरमा १२–९ को अग्रता बनाएको ज्ञान टाइगरले अन्तिमसम्म अग्रतालाई कायम राख्दै जित अन्तर फराकिलो बनायो । ज्ञान टाइगरले दोश्रोमा ८–२, तेश्रोमा २४–४ र चौथोमा ८–७ अंक जोड्यो ।

संस्कृतिका सुशांक अधिकारी प्रतियोगिताकै सर्वाधिक स्कोरकर्ता बने । उनले प्रतियोगिताभर ४२ स्कोर गरे ।

विजेतालाई राष्ट्रिय खेलकुद परिषद्का पूर्व सदस्य–सचिव रमेशकुमार सिलवाल, पाठशालाका प्रबन्ध निर्देशक टंक आचार्य, प्रमुख कार्यकारी अधिकृत इश्वर अधिकारी, प्रिन्सिपल विश्वनाथ कँडेललगायतले एक कार्यक्रमबीच पुरस्कृत गरे ।

तीनदिने प्रतियोगितामा ८ टिमले प्रतिस्पर्धा गरेको पाठशालाका बास्केटबल प्रशिक्षक अंकित श्रेष्ठले जनाएका छन् ।