न्यु इरा कप फुटसलमा २५ टोली

काठमाडौं । न्यु इरा एकेडेमीको आयोजनामा न्यु इरा कप अन्तर विद्यालय फुटसल प्रतियोगिता आयोजना हुने भएको छ ।

तारकेश्वर नगरपालिका ८ हिलेडोलमा रहेको न्यु इराले सोमबार पत्रकार सम्मेलन गर्दै प्रतियोगिता फागुन २५ देखि २७ सम्म हुने जानकारी गराएको छ ।

मनमैजुस्थित एन्जल्स स्पोर्ट्स एकेडेमीको फुटसल कोर्टमा हुने प्रतियोगितामा २५ टोलीको सहभागिता रहेको आयोजकले जनाएको छ । प्रतियोगिता लिग कम नकआउटको आधारमा हुनेछ ।

सोमबार नै प्रतियोगिताको समूह विभाजन गरिएको छ । सहभागी २५ टोलीलाई ८ समूहमा विभाजन गरिएको छ । हरेक समूहमा ३ टोली रहँदा एक टोलीमा चार टोली रहेका छन् । हरेक समुहका शीर्ष दुई टोली प्रि–क्वाटरफाइनलमा प्रवेश गर्नेछन् ।

समूह ‘ए’ मा आयोजक न्यु इरा ‘ए’, एन्जल हार्ट सेकेन्डरी स्कुल र प्रगति रहेका छन् । समूह ‘बी’ मा सिर्जना ज्ञान सागर ‘बी’, एन्जल हार्ट नेशनल स्कुल, र रोज मेरी आइडल रहेका छन् । समूह ‘सी’ मा चिल्ड्रेन हेराल्ड एकेडेमी, विभुति विद्यासागर र सेक्रेट हार्ट तथा समूह ‘डी’ मा काठमाडौं लिंकन, पृथ्वी र माउन्ट ग्लोरी रहेका छन् ।

समूह ‘ई’ मा लाली गुराँस, जीवन ज्योति र हिमरश्मी रहेका छन् । समूह ‘एफ’ मा स्वस्तिश्री गुरुकुल, मनास्लु पब्लिक र सेव स्कुल रहेका छन्  । यस्तै समुह ‘जी’ मा सिर्जना ज्ञान सागर ‘ए’, विद्या संस्कार र ल्यान्डमार्क परेका छन् । समूह ‘एच’ मा न्यु इरा ‘बी’, स्कलर्स होम एकेडेमी, किड्स लर्निङ स्कुल र कौशस स्कुल रहेका छन् ।