एनआरटीको सकसपूर्ण जित

काठमाडौं। न्युरोड टिम (एनआरटी)ले राष्ट्रिय लिगमा चित्लाङ फुटबल क्लबलाई पराजित गरेको छ।

त्रिपुरेश्वरस्थित दशरथ रंगशालामा आइतबार सम्पन्न खेलमा एनआरटी २–१ ले विजयी भएको हो। एनआरटीको यो पाँचौं जित हो। लिगमा ९ खेल खेलेको एनआरटीले १९ अंक जोडेको छ।

चित्लाङको भने यो चौथो हार हो। समान खेलबाट चित्लाङको ७ अंक छ। खेलको नवौं मिनेटमा अञ्जन विष्टले प्रहार गरेको फ्रिकिकलाई चित्लाङका गोलकिपर सन्तोष महतले उत्कृष्ट बचाउ गर्दै टोलीको संकटलाई टारे। तर, त्यसको एक मिनेटपछि राजीव लोप्चनले गोल गर्दै एनआरटीलाई सुरुआती अग्रता दिलाए।

२४औं मिनेटमा जन्मजय धामीको पासलाई अञ्जनको फितलो प्रहारले लक्ष्य लिन सकेन। ३५औं चित्लाङको सोलोमन अदेइनका इलेशनमीले गरेको प्रहार दायाँपट्टीको पोल हुँदै बाहिरियो।

त्यसको दुई मिनेटपछि एनआरटीका सनम सोदेम्बा लिम्बूले आत्मघाती गोल गरेपछि चित्लाङ १-१ को बराबरीमा आउँदै खेलमा फर्कियो।

खेलको ५४औं मिनेटमा टिमोथी चिएमेरिए ओकेरेकेले गोल गर्दै एनआरटीलाई २–१ को जित दिलाए।