इन्टरलाई शीर्षस्थानमा १३ अंकको अग्रता

काठमाडौं। इन्टर मिलानले सिरी ‘ए’ मा शीर्षस्थानमा १३ अंकको अग्रता बनाएको छ।

बोडो/ग्लिम्टसँग पराजित हुँदै च्याम्पियन्स लिगबाट बाहिरिएपछि इन्टरले जेनोआ सीएफसीविरुद्ध २–० को जित निकाल्दै उत्कृष्ट पुनरागमन गरेको हो।

योसँगै इन्टरले २७ खेलबाट ६७ अंक पुर्‍याएको छ। एक खेल कम खेलेको मिलानको ५४ अंक छ।

३१औं मिनेटमा फेडेरिको डिमार्कोले आक्रमण सुरु गर्दै हेन्रिख मिखितारियनसँग पास साटासाट गरेपछि असम्भव कोणबाट भली प्रहार गर्दै गोल गरे। ७०औं मिनेटमा हाकान चाल्हानोउलुले पेनाल्टीमार्फत अग्रता दोब्बर पारे।

दोस्रो स्थानको एसी मिलानले आइतबार क्रेमोनेसे भ्रमण गर्नेछ भने अर्को साता मिलान डर्बीमा इन्टरको सामना गर्नेछ।

यसअघि कोमोले रेलिगेसनको खतरामा रहेको लेच्चेलाई ३–१ ले हराउँदै महत्त्वपूर्ण जित निकालेको थियो।