काठमाडौं । प्रशिक्षक विष्णु गुरुङ नेपाली राष्ट्रिय फुटबल टिमको प्रशिक्षक टोलीमा आबद्द भएका छन् ।
ए डिभिजन क्लब संकटाका मुख्य प्रशिक्षक गुरुङ सहायक प्रशिक्षकको रुपमा टिममा जोडिएका हुन् ।
मुख्य प्रशिक्षक अब्दुलाह अलमुताइरीको आग्रहमा प्रशिक्षक गुरुङलाई टोलीमा आबद्द गरिएको हो ।
राष्ट्रिय टिमको सहायक प्रशिक्षकमा भने किरण श्रेष्ठ र गोलकिपर प्रशिक्षकमा विकास मल्ल रहेका छन् ।
गुरुङको नेतृत्वमा संकटाले जारी लिगमा उत्कृष्ट खेलिरहेको छ । गुरुङ राष्ट्रिय फुटसल टिमको मुख्य प्रशिक्षक भएर काम गरिसकेका छन् ।
राष्ट्रिय टिमको प्रशिक्षक टोलीमा आबद्द हुँदा आफुले सम्मानित भएको महशुस गरेको गुरुङले बताए ।
'एकदमै उत्साहित छु । सम्मानित भएको महसुश गरेको छु । जुन कुरा सिक्न पाएको थिएन, जुन कुराहरु सिक्न इच्छुक थिए । अब्दुल्लाह सरले बोलाउनु भएको छ । यसको लागि एन्फा र प्रशिक्षकलाई धन्यवाद,' गुरुङले भने, 'मेरो एउटा सपना हो । र, यो एउटा सुरुआत हो । मैले अझै काम गर्नु पर्नेछ ।'
नेपालले अफ्रिकी राष्ट्र मरिससविरुद्धको मैत्रीपूर्ण फुटबल खेलका लागि मंगलबारबाट तयारी सुरु गरेको छ ।
राष्ट्रिय फुटबल टिमका मुख्य प्रशिक्षक अब्दुलाह अल्मुताईरीले बन्द प्रशिक्षणमा ३५ खेलाडी बोलाएका छन्।
नेपालले दशरथ रंगशालामा मरिसससँग दुई मैत्रीपूर्ण खेल खेल्ने छ । मैत्रीपूर्ण खेल जनवरी २९ र फेब्रुअरी १ मा हुनेछ ।
-1752288200.webp)
