काठमाडौं । लामो समयपछि राष्ट्रिय फुटबल टिमको बन्द प्रशिक्षणमा परेका मिडफिल्डर जगजित श्रेष्ठले आफ्नो करियरलाई सार्थकता दिने यो अन्तिम अवसर भएको बताएका छन् ।
बन्द प्रशिक्षणको पहिलो दिन एन्फा कम्प्लेक्स सातदोबाटोमा संचारकर्मीसँग कुरा गर्दै जगजितले धेरै वर्षपछि अवसर पाएको र यसलाई सार्थकता दिने बताएका हुन् ।
'धेरै सकारात्मक छु । धेरै वर्षपछि मलाई एउटा अवसर आएको छ । मेरो लागि यो अन्तिम मौका हो । मेरो करियरलाई सार्थकता दिने । त्यसैले सकारात्मक लिएको छु । खुशी छु,' जगजितले भने ।
अफ्रिकी राष्ट्र मरिससविरुद्धको मैत्रीपूर्ण फुटबल खेलका लागि नेपालले तयारी सुरु गरेको हो ।
राष्ट्रिय फुटबल टिमका मुख्य प्रशिक्षक अब्दुलाह अल्मुताईरीले बन्द प्रशिक्षणमा ३५ खेलाडी बोलाएका छन्।
नेपालले दशरथ रंगशालामा मरिसससँग दुई मैत्रीपूर्ण खेल खेल्ने छ । मैत्रीपूर्ण खेल जनवरी २९ र फेब्रुअरी १ मा हुनेछ ।
'धेरै खुशी लागेको छ । वातावरण धेरै परिवर्तन छ । प्रशिक्षकको तरिका धेरै प्रोफेसनल रैछ । एकदम मजा आइरहेको छ,' जगजितले थपे ।
जगजितले नेपालका लागि अन्तिम पटक सन् २०१५ मा खेलेका थिए, जति बेला नेपाल साफ च्याम्पियनसिप खेल्न भारतको केरलामा थियो ।
उनी भारतविरुद्धको दोस्रो हाफमा विमल घर्तिमगरको स्थानमा मैदानमा प्रवेश गरेका थिए ।
जगजितले नेपालका लागि सन् २०११ मा भुटानविरुद्ध खेल्दै डेब्यु गरेका थिए । उनले नेपालका लागि २९ औं क्याप खेलेका छन् ।
यस पटक टिममा पर्दै नेपाललाई योगदान दिने उनको इच्छा छ ।
'बल पायो की अट्याक शैली छ । मेरो खेल्ने शैली पनि त्यहिँ हो । यदि टिममा परे भने मैले धेरै योगदान दिन सक्छु,' जगजित भन्छन् ।
जगजितले जारी सहिद स्मारक ए डिभिजन लिग त्रिभुवन आर्मी क्लबबाट खेलिरहेका छन् । उनले उत्कृष्ट प्रदर्शन गरिरहेका छन् । जसको कारण उनी प्रशिक्षकको नजरमा परेका हुन् ।
जगजितले सुरुवातमा भने आर्मीको टिममा घुलमिल हुन गार्हो भएको बताए ।
'आर्मीको टिममा घुलमिल हुन गार्हो भयो सुरुमा । मौषमले गर्दा पनि विरामी भईरहे । आर्मीको खेल्ने शैली फरक थियो,' जगजितले भने, 'अहिले पनि आर्मीसँग पुरै कम्बिनेसन मिलेको छैन । तर, पहिले भन्दा सुधारिएको छ ।'
-1752288200.webp)
