एजेन्सी । पाहुना टोली वेष्ट इण्डिजविरुद्धको पहिलो एकदिवसीय क्रिकेटमा भारत विजयी भएको छ ।
कप्तान विराट कोहली र रोहित शर्माले शतकीय इनिङस खेलेपछि आइतबार भारतले वेष्ट इण्डिजलाई ८ विकेटले हराएको हो ।
गुवाहाटीमा वेष्ट इण्डिजले दिएको ३२३ रनको लक्ष्य भारतले ४२ ओभर १ बलमा मात्र २ विकेट गुमाएर पुरा गर्यो ।
भारतको जितमा ओपनर शर्माले अविजित १५२ रनको शतकीय इनिङस खेले । शर्माले ११७ बलमा १५ चौका र ८ छक्का प्रहार गरे । योसंगै शर्मा एकदिवसीय क्रिकेटमा सर्वाधिक पटक १५० रन बनाउने पहिलो खेलाडी बने । उनले ६ एकदिवसीय क्रिकेटमा १५० रनको आँकडा पुरा गरेका छन् । उनले भारतका महान खेलाडी सचिन तेन्दुलकरले ५ खेलमा बनाएको कीर्तिमान भङ्ग गरेका हुन् ।
यस्तै कप्तान कोहलीले १०७ बलमा २१ चौका र २ छक्कासहित १४० रनको योगदान दिए । योसंगै कोहलीले समग्रमा ६० औं शतक र ३६ औं एकदिवसीय शतक बनाउन सफल भए । त्यसबाहेक भारतका ओपनर शिखर धवन ४ रनमा आउट हुँदा अम्बाती रायडुले अविजित २२ रन जोडे । वेष्ट इण्डिजका ओशाने थोमस र देभेन्द्र विश्वले एक एक विकेट लिए ।
यसअघि टस हारेर पहिले ब्याटिङ गरेको वेष्ट इण्डिजले पुरै ५० ओभर खेल्दै ८ विकेट गुमाएर ३२२ रनको उच्च योगफल तयार गरेको थियो ।
वेष्ट इण्डिजका लागि शिम्रोन हेटम्एरले १०६ रनको शतकीय इनिङस खेले । त्यस्तै किएरण पावेलले ५१ तथा कप्तान जासन होल्डरले ३८ रन जोडे । भारतका युजभेन्द्र चाहलले ३ तथा रबिन्द्र जडेजा र मोहमद शामीले समान २/२ विकेट लिए ।
यो जितसंगै भारतले पाँच खेलको एकदिवसीय सिरिजमा १ - ० ले अग्रता बनाएको छ । यसअघि भारतले दुई खेलको टेष्ट सिरिजमा क्लिन स्विप गरेको थियो ।
