नेपालको सबै क्षेत्रमा फुटबलको आकर्षण उत्तिकै छ : प्रधानमन्त्री

काठमाडौं । प्रधानमन्त्री शेर बहादुर देउवाले नेपालको सबै भौगोलिक क्षेत्र र सबै उमेर समूहमा फुटबल खेलको आकर्षण उत्तिकै रहेको बताएका छन् ।

साफ उपविजेता फुटबल टोलीलाई सम्मान गरेपछि बोल्दै प्रधानमन्त्री देउवाले नेपालमा फुटबलको आकर्षण सबै क्षेत्रमा उत्तिकै रहेको बताएका हुन्  ।

'नेपालमा फुटबल खेलको आकर्षण सबै भौगोलिक क्षेत्र र सबै उमेर समूहमा उत्तिकै रहेको छ,' प्रधानमन्त्री देउवाले भने, 'देशभर छरिएर रहेका फुटबल खेलका प्रतिभाहरु पहिचान गर्दै उनीहरुको खेल कौशल बढाउन सम्बन्धित निकाय लागि पर्नेमा विश्वास लिएको छु ।'

सरकारले मंगलबार साफ फुटबलको उपविजेता बनेको राष्ट्रिय फुटबल टिमका सदस्यलाई नगदसहित सम्मान गरेको हो ।

प्रधानमन्त्री देउवाले साफको उपविजेता राष्ट्रिय फुटबल टिमका खेलाडीलाई जनही ५ लाख नगदसहित सम्मान गरेका हुन् । यस्तै प्रशिक्षकहरु जनही ३ लाख नगदबाट सम्मानित भए ।

प्रधानमन्त्री देउवाले खेलाडीको हौशला बढाउन सम्मानको कार्यक्रमलाई निरन्तरता दिने बताए ।

'नेपाल सरकारले खेलाडीहरुको हौशला बढाउन भविष्यमा अन्य विधामा पदक जित्ने खेलाडीलाई सम्मान गर्दै जाने नै छ । नेपाल सरकारको तर्फबाट खेलकुद विकासको लागि सहयोग दिनेछ,' प्रधानमन्त्री देउवाले भने  ।

प्रधानमन्त्री देउवाले साफमा उपविजेता हासिल गरेकोमा अखिल नेपाल फुटबल संघका अध्यक्ष, पदाधिकारी, खेलाडी र प्रशिक्षकहरुलाई बधाई समेत दिए ।