युथ एथलेटिक्स च्याम्पियनसिप अर्को साता

काठमाडौं । युथ एथलेटिक्स च्याम्पियनसिप अर्को साता आयोजना हुने भएको छ ।

एथ्लेटिक्स परिवार नेपालले बिहीबार पत्रकार सम्मेलन गर्दै च्याम्पियनसिप मंसिर २० गते र २१ गते आयोजना हुने जनाएको छ ।

दशरथ रंगशालामा आयोजना हुने च्याम्पियनसिपमा छात्र र छात्रातर्फ यू-१६ र यू-२० तर्फ प्रतिस्पर्धा हुनेछ । यू-१६ मा १२ र यू-२० मा १६ गरि कुल २८ ट्रयाक एण्ड फिल्ड इभेन्ट्समा प्रतिस्पर्धा हुनेछ ।

च्याम्पियनसिपमा नेपालका विभिन्न जिल्लामा रहेका स्कुल, कलेज र निकायका २५० भन्दा बढी खेलाडीहरुको सहभागिता रहने छ ।

च्याम्पियनसिपमा बंगलादेशका खेलाडीको समेत सहभागिता रहने छ । बंगलादेशबाट ५ महिला र ७ पुरुष गरि १२ सदसीय टिम नेपाल आईसकेको अध्यक्ष राजन खत्रीले जानकारी गराए ।

विजयी खेलाडीहरुलाई नगदबाट पुरस्कृत गरिने आयोजकले जनाएको छ ।

यस्तै उत्कृष्ट  छात्र र छात्रातर्फ गरि ४ जनालाई पुरस्कृत गरिनेछ ।

यस्तै कार्यक्रममा एथलेटिक्स संघका पूर्व अध्यक्ष तथा प्रशिक्षक रघुराज वन्तले दुई महिला खेलाडीलाई खेल सामग्री सहयोग गरेका छन् ।  

वन्तले रजिना दुलाल र पुलिस क्लबकी बिर्सना कुमाललाई स्पाइक जुत्ता सहयोग गरेका हुन् ।