म्याराथन विजेताले ५० हजार प्राप्त गर्ने

काठमाडौं । चौंथो विन्टर अल्ट्रा ट्रेल हाफ म्याराथनका विजेताले नगद ५० हजार प्राप्त गर्ने भएका छन् ।

बागमती प्रदेश खेलकुद विकास परिषद् र सिन्धुपाल्चोक जिल्लाको पाँच पोखरी थाङपाल गाउँपालिका खेलकुद विकास समितिले संयुक्तरुपमा कात्तिक २७ मा म्याराथन आयोजना गर्दैछ ।

बिहीबार काठमाडौंमा आयोजित पत्रकार सम्मेलनका क्रममा आयोजकले पुरुष तथा महिलातर्फका विजेतालाई नगद ५० हजारले पुरस्कृत गर्ने जनाएको हो ।

त्यसैगरी पुरुष तथा महिलातर्फ दोस्रो, तेस्रो, चौथो र पाँचौ हुनेले क्रमश ३० हजार, २० हजार, १० हजार र ५ हजार प्राप्त गर्नेछन् ।

सिन्धुपाल्चोकबाट सहभागी हुने खेलाडीहरु मध्येबाट प्रथम, दोस्रो र तेस्रो हुनेलाई क्रमश १५ हजार, १० हजार र ५ हजार प्रदान गरिनेछ ।

भेट्रान्सतर्फ शीर्ष तीन स्थान हात पार्ने धावकहरु क्रमश १० हजार, ८ हजार र ५ हजारबाट पुरस्कृत हुनेछन् ।

सहभागी सबैलाई प्रमाणपत्र र मेडल उपलब्ध गराइने आयोजकले जानकारी गराएको छ ।

प्रतियोगितामा विभागीय टोली तथा व्यक्तिगत गरी करिब १ सय ५५ जनाले सहभागिता जनाउने छन् ।

आयोजकका अनुसार प्रतियोगिताका लागि करिब २१ लाख ४१ हजार खर्च हुने अनुमान गरिएको छ ।

पाँच पोखरी विश्वकै अग्लो ताल मध्ये नवौं स्थानमा पर्छ । पर्यटकीय हिसाबले निकै महत्वपूर्ण मानिएको पाँच पोखरीबाट हिमालय रेञ्ज पनि देखिन्छ ।

पाँच पोखरी थाङपाल गाउँपालिका प्रमुख टासी लामाले यस प्रतियोगिताबाट पर्यटन प्रवद्र्धन गर्नका लागि सहयोग पुग्ने बताए ।

यता बागमती प्रदेश खेलकुद परिषद्का सदस्य सचिव सुर्यलाल भण्डारीले खेलाडीको सबै कुराको व्यवस्थापन आयोजकले गर्ने भएकाले इन्ट्री फि राखिएको बताए ।

भण्डारीले खेलकुदका लागि उपयुक्त स्थानको रुपमा सिन्धुपाल्चोक रोजिएको जनाए । यसले पर्यटन विकासमा समेत टेवा पुग्ने उनले उल्लेख गरे ।

भण्डारीका अनुसार अनुसन्धानका आधारमा म्याराथनको रुट तयार पारिएको हो ।