काठमाडौं । नेपाल आर्मी भेट्रान्स क्लबले मेयर कप भेट्रान्स फुटबल प्रतियोगितामा विजयी सुरुआत गरेको छ ।
त्रिपुरेश्वरस्थित दशरथ रंगशालामा शनिबार भएको उद्घाटन खेलमा फुटबल फेलोसिप क्लबलाई ७-१ गोल अन्तरले हराउँदै आर्मीले सुखद सुरुआत गरेको हो।
आर्मीको जितमा विकर्ण श्रेष्ठले ह्याट्रिक पूरा गरे ।
यस्तै हरि महतो, राजु तामाङ, जनमत कार्की र चक्र तामाङले एक एक गोल गरे ।
फुटबल फेलोसिपका नन्द नाथ खड्कीले एक गोल फर्काए ।
दोस्रो खेलमा भनिमण्डल स्पोर्टिङ क्लबले न्युरोड टिम (एनआरटी) लाई २-० ले हराएर सुखद सुरुआत गरेको छ ।
भनिमण्डलको जितमा विजय श्रेष्ठ र कृष्ण मलेकारले एक एक गोल गरे ।
त्यस्तै दिनको तेस्रो खेलमा फ्रेन्ड्स क्लब भेट्रान्स र एसएनकेसीले २-२ गोलको बराबरी खेल्दै अंक बाडेका छन् ।
फ्रेन्ड्सका तेज थापा र मनोज लामाले एक एक गोल गरे । एसएनकेसीका बालगोपाल साहुखल र राजेश शाहीले एक एक गोल गरे ।
फुटबलर्स मिसन टुगेदरको आयोजनामा जारी प्रतियोगितामा २१ टिमले प्रतिस्पर्धा गरिरहेका छन् ।
२१ टिमलाई सात समूहमा विभाजन गरिएको छ । प्रत्येक समूहका विजेता र एक उत्कृष्ट उपविजेता टिमले दोस्रो चरणमा स्थान बनाउनेछन् ।
प्रतियोगिताको विजेताले ५ लाख र उपविजेताले २ लाख ५० हजार पाउने पाउने छन्।
त्यस्तै विधागत रुपमा उत्कृष्ट खेलाडीलाई विशेष पुरस्कारको व्यवस्था गरिएको आयोजकले जनाएको छ ।
