काठमाडौं । पोखरा, नेपालको पर्यटकीय गन्तब्य । तर, पोखरालाई चिनाउने अन्य चिनारी पनि छ ।
पर्यटकीय गन्तब्यबाहेक पोखरालाई चिनाउने अर्को चिनारी हो, 'खेलकुद' ।
हो, पोखरा नेपाली खेलकुदको उर्वर भूमि नै हो । साहसिक खेलकुदका लागि होस् या अन्य खेलकुद । पोखरा खेलाडी जन्माउने थलो हो ।
गत महिना इन्डोनेसियामा सम्पन्न एसियन गेम्समा पोखराले जन्माएको साहसिक खेल प्याराग्लाइडिङले नेपाललाई एक मात्र पदक दिलाउन सफल भयो ।
प्याराग्लाइडिङको पुरुष टिमले जितेको रजत पदक नेपालले एसियन गेम्समा पाएको सर्वाधिक ठुलो पदकमध्ये एक हो । यसअघि नेपालले तेक्वान्दोमा मात्र एक रजत जितेको थियो ।
पोखरा प्याराग्लाइडिङले मात्र चर्चित छैन । पोखरा नेपाली फुटबलको लागि उर्वर भुमि समेत हो । नेपाली फुटबलमा पोखराले बसन्त गौचन, अनिल गुरुङ जस्ता लिजेण्ड खेलाडीहरु जन्माएको छ । यस्तै भलिबलकी मन्जु गुरुङ, सिपोरा गुरुङ पोखराले नै जन्माएको हो ।
तर, पछिल्लो समय पोखराले अर्को चिनारी पाएको छ । त्यो हो, पोखरा प्रिमियर लिग (पीपीएल) क्रिकेट । त्यसो त पोखराले करण केसी जस्ता क्रिकेटर जन्माईसकेको छ । तरपनि पोखरेली क्रिकेटले लय समाउन सकिरहेको थिएन ।
आगामी कार्तिक ९ देखि २० गतेसम्म आयोजना हुने पहिलो संस्करणको पीपीएलबाट पोखरेली क्रिकेटले लय समात्ने अपेक्षा गरिएको छ । क्विन्स इभेन्ट्स म्यानेजमेन्ट प्रालिले गर्न लागेको पीपीएलसंगै पोखरा क्रिकेटको मुख्य गन्तब्य बन्ने पक्का छ ।
'पीपीएल क्रिकेटले भोलिको दिनमा पोखरा र आसपासको स्थानीय क्षेत्रमा क्रिकेटको क्रेज बढ्नेछ,' क्विन्स इभेन्ट्सका प्रबन्ध निर्देशक छुम्बी लामाले खेलपाटीसंग भने, 'मुख्यतः यस क्षेत्रको क्रिकेट र समग्र नेपाली क्रिकेट विकासमा यसले टेवा पुर्र्याउनेछ ।'
नेपालका सुन्दर हिमाल माछापुच्छ्रे र अन्नपूर्णको काखमा हुने पीपीएल क्रिकेटमा ६ फ्रेन्चचाइज टोलीले प्रतिस्पर्धा गर्नेछन् । लिगमा घरेलु टोली पोखरा पल्टनसंगै विराटनगर टाईटन्स,चितवन राइनोज,बुटवल ब्लास्टर,काठमाडौं रोयल्स र एक्स्पर्ट धनगढी ब्लुजले प्रतिस्पर्धा गर्नेछन् ।
सहभागी टोलीले मार्की खेलाडी र अक्सनबाट खेलाडी समेत अनुबन्ध गरिसकेको छ । यस्तै सबै फ्रेन्चचाइज टोलीले विदेशी खेलाडी समेत राख्नु पर्ने हुन्छ । तर, कुनैपनि टोलीले विदेशी खेलाडीको घोषणा गरेको छैन ।
आँखै अगाडी देखिने हिमाल र क्रिकेट खेल्ने मैदान कमै पाइन्छ । यस्तो वातावरणमा खेल्ने मौका पनि कमै खेलाडीले पाउछन् । तर, पीपीएल खेल्ने खेलाडीले यो अवसर पाउने प्रबन्ध निर्देशक लामा बताउछन् ।
'माछापुच्छ्रे र अन्नपूर्णको रेन्च अगाडी राष्ट्रिय तथा अन्तर्राष्ट्रिय खेलाडी खेल्न पाउनेछन्,' प्रबन्ध निर्देशक लामा भन्छन्, 'यस्तो वातावरणमा कमै खेलाडीले खेल्न पाउछन् । त्यसैले राष्ट्रिय तथा अन्तर्राष्ट्रिय खेलाडीको लागि यो महत्वपूर्ण गन्तब्य बन्नेछ ।'
पीपीएलको लागि पोखरा रंगशाला हातमा रहेको मैदान तयार भईसकेको छ । दशैँ अघिसम्म मैदानको सम्पूर्ण तयारी सकिनेछ । क्विन्सका प्रबन्ध निर्देशक लामाले अस्थाई प्याराफिटबाहेक अन्य काम सकिएको जानकारी दिए ।
'मैदानको पिच निर्माण र आउट फिल्डको कार्य सकिएको छ । मंगलबारबाटै अस्थाई प्याराफिटको काम सुरु हुन्छ । तयारी अन्तिम चरणमा पुगेको छ । दशैँ अगाडी सबै काम सकिन्छ,' प्रबन्ध निर्देशक लामाले भने ।
प्रतियोगिताका लागि भारतबाट क्युरेटर ल्याएर चार वटा पिच निर्माण गरिएको छ । भारतको मुम्बईबाट आएका पिच क्युरेटर सन्तोष सिंहले पिच निर्माण गरेका हुन् ।
प्रतियोगिताका लागि ४ हजार देखि ४५ सय दर्शक अटाउने अस्थाई प्याराफिट बनाउने प्रबन्ध निर्देशक लामाले जानकारी गराए । त्यसबाहेक प्रतियोगिताको लागि आवश्यक पेभेलियन, बाउण्ड्री रोप, स्थायी स्कोरबोर्डको व्यवस्थापन समेत भईरहेको लामाले बताए ।
आयोजकले यस क्रिकेट मैदानलाई वैकल्पिक मैदानको रुपमा स्थापित गराउने योजना समेत बनाएको छ । क्विन्सका प्रबन्ध निर्देशक लामाले नेपालमा कम क्रिकेट मैदान रहेको अवस्थामा यस मैदानमा अन्तर्राष्ट्रिय क्रिकेट खेल खेलाउन मिल्ने बताए ।
'हामीले यस मैदानलाई एक प्रतियोगिताको लागि मात्र तयार गरेका छैनौ । यहाँको प्रदेश सरकारसंग छलफल गरेर सधै भरी क्रिकेट खेल्न मिल्ने मैदान तयार गरिरहेका छौं,' निर्देशक लामाले थपे, 'नेपालमा अन्तर्राष्ट्रिय खेल खेलाउने भेन्यु कम छ । तर, हामीले यस मैदानलाई वैकल्पिक मैदान बनाउने तयारी गरेका छौं । यहाँको सुन्दर वातावरणमा अन्तर्राष्ट्रिय खेल खेल्न निकै उपयुक्त हुनेछ ।'
तस्विर : पीपीएल
