प्रभाव जमाउँदै एमयूएफसी विजय चोक

काठमाडौं । झापा एफसी घरेलु फुटबलको नयाँ नाम हो । नीजि कम्पनीको रुपमा क्लब दर्ता गरेर अघि बढेको झापा एफसीले शीर्ष डिभिजनको फुटबल खेल्ने लक्ष्य राखेको छ ।

तर सी डिभिजन छनोटको प्रारम्भिक खेल उसका लागि सुखद रहेन । उसलाई विजय चोक युथ क्लबले स्तब्ध पार्यो । इङ्लिस क्लब म्यानचेस्टर युनाइटेडका नेपाली समर्थक जोडिएर बनेको एमयूएफसी विजय चोक युथ क्लबले सी डिभिजनमा शानदार सुरुवात गरेको छ । र क्लबले सी डिभिजन छनोटमा राम्रो प्रभाव छाड्ने संकेत गरेको छ ।

पहिलो खेलमै झापा एफसीविरुद्ध प्राप्त जितले क्लब हौसिएको छ र सी डिभिजन छनोटको लामो यात्रा तय गर्ने विश्वास जितेको छ ।

शुक्रबार एन्फा कम्प्लेक्स सातदोबाटोमा विजयी युथले झापा एफसीलाई स्तब्ध बनायो ।

खेलको ७५ औं मिनेटमा सञ्जिव विष्टको गोलमा एमयूएफसी विजय चोकले खेलमा अग्रता बनायो । शिशिर बस्नेतको सुन्दर क्रसमा सञ्जिवले गोल गरेका थिए । निकै प्रतिस्पर्धात्मक खेलमा झापाले विजय चोकको चट्टानी डिफेन्स तोड्न सकेन । गोलकिपर सञ्जिव लामाले समेत केही उत्कृष्ट बचाउ गरे र म्यान अफ दी म्याच बने ।

बुधबार मात्र विजय चोकले लिग चरणको पहिलो खेलमा शान्ति समूहलाई हराएको थियो । प्राप्त दुई जितले क्लब दोस्रो चरणमा प्रवेश गरेको छ ।

पहिलो सहभागीतामै प्राप्त सफलताले क्लबका खेलाडी र पदाधिकारी हौसिएका छन्, क्लबले लामो यात्रा तय गर्ने छनक देखाएको छ ।

खेल सकिएपछि ड्रेसिङ रुपमा खेलाडीले मनाएको उत्सवले त्यही संकेत गर्दथ्यो ।