विश्व फुटबलको सर्वोच्च संस्था फिफाले यसबारे लामो गहन अध्ययन गरेको छ र यसको प्रतिवेदन भर्खरै निस्केको छ । फिफाले सन् २०११ देखि २०२० को समयलाई आधार मानेको हो ।
यो बीचमा ४८ अर्ब ५० करोड डलर फुटबल खेलाडीको किनबेचमा खर्च गरिएको छ । सबैभन्दा खर्च गर्नेमा दुई इंग्लिस क्लब रहेका छन्, म्यानचेस्टर सिटी र चेल्सी । अनि बढी खर्चालु शीर्ष ३० क्लबमा १२ त इंग्लिस क्लब नै छन् । यो सूचीको २१ औं स्थानमा साउथह्याम्पटन छ र उसले बोरुसिया डर्टमुन्डले भन्दा बढी खर्च गरेको छ ।
ठ्याक्कै सन् २०१० को अक्टोबरमा फिफाले खेलाडी ट्रान्सफरको नयाँ नियम ल्याएको थियो । फिफाले अनिवार्य गरेको यस नियम अनुसार मात्र खेलाडी एउटा क्लबबाट अर्कोमा जान सक्छन् । यो समय अवधिमा कुनै एउटै देशका खेलाडी सबैभन्दा बढी किनबेच भएको छ भने त्यो ब्राजिलको छ ।
पूरा विश्वमा १५ हजार १ सय २८ ब्राजिली खेलाडी फुटबल ट्रान्सफर बजारमा किनबेच भए । अनि अहिलेसम्मकै सबैभन्दा महँगा खेलाडी रहेका छन्, ब्राजिलकै नेयमार । उनलाई पेरिस सेन्ट जर्मेन (पीएसजी) ले २० करोड डलरमा किनेको थियो । सन् २०२० सम्ममा त्यस्ता १४ अनुबन्ध भएका छन् जसमा संलग्न मूल्य १० करोड डलर भन्दा माथि छ ।
