काठमाडौं । भारतीय फुटबल टिमका कप्तान सुनिल क्षेत्रीले नेपालसँगको खेल सहज नहुने बताएका छन्।
नेपालसँगको मैत्रीपूर्ण खेलका लागि काठमाडौं आईपुगेका कप्तान क्षेत्रीले विमानस्थलमा संचारकर्मीसँग कुरा गर्दै घरेलु टिमसँगको खेल सहज नहुने बताएका हुन्।
'नेपालमा खेल्न पाउँदा खुसी छौं । नेपालसँगको मैत्रीपूर्ण खेल खेल्न सहज छैन,' उनले भने, 'नेपालसँग यस अघि पनि खेलेका छौं । नेपाल बलियो टोली र कठिन प्रतिद्वन्द्वी हो ।'
भारतले नेपालसँग दुई मैत्रीपूर्ण खेल खेल्नेछ। त्रिपुरेश्वरस्थित दशरथ रंगशालामा हुने मैत्रीपूर्ण खेल भदौ १७ र २० (सेप्टेम्बर २ र ५) मा हुनेछ।
कप्तान क्षेत्रीले नेपालले पछिल्लो समय उत्कृष्ट खेलिरहेको बताए । उनले नेपालमा खेल्न पाउँदा खुशी लागेको समेत बताए।
'नेपालमा आएर खेल्न पाउँदा खुसी छौं । निमन्त्रणा गरेकोमा नेपाललाई धन्यवाद दिन चाहन्छु । नेपालसँग खेल्न पाउँदा खुसी लागेको छ,' उनले थपे ।
माल्दिभ्समा आयोजना हुने साफ च्याम्पियनसिपको तयारीका लागि नेपाल र भारतले मैत्रीपूर्ण खेल खेल्न लागेको हो।
साफ च्याम्पियनसिप अक्टोबर १ देखि १६ (असोज १५ देखि ३०) गतेसम्म आयोजना हुनेछ।
