काठमाडौं । नेपाली राष्ट्रिय फुटबल टोलीका सदस्य रोहित चन्दले भारतविरुद्धको मैत्रीपूर्ण खेल गुमाउने भएका छन् ।
इन्डोनेसियाको रहेका रोहित मैत्रीपूर्ण खेलका लागि नेपाल नआउने भएका हुन् । रोहित पर्सिजा जकार्ताबाट इन्डोनेसियाको शीर्ष डिभिजनको लिग खेलिरहेका छन् ।
राष्ट्रिय टिमको बन्द प्रशिक्षण छाडेर रोहित ९ दिन अघि इन्डोनेसिया प्रस्थान गरेका थिए । उनले शुक्रबारमात्र ८ दिनको क्वारेन्टाइनको समय पूरा गरेका छन् । इन्डोनेसियाको लिग शुक्रबारबाट सुरु भएको छ ।
रोहितका मेन्टर समेत रहेका दाजु रबिन्द्र चन्दले मुख्य प्रशिक्षकसँगको सल्लाह अनुसार उनी इन्डोनेसिया उडेको बताए । उनले प्रशिक्षककै स्विकृतिमा रोहित इन्डोनेसिया गएको बताए ।
‘कोभिडका कारण कठिन अवस्थामा उताको लिग सुरु भएको छ । क्लबले समेत बोलायो । साफ च्याम्पियनसिप रि–सेड्युल गर्ने बित्तिकै प्रतियोगिता लामो हुन गयो । कुनैपनि क्लबले लामो समय खेलाडीलाई रिलिज गर्न मान्दैन ।’ रबिन्द्रले खेलपाटीसँग भने, ‘साफलाई महत्वमा राखेको हुनाले रोहित भारतविरुद्ध उपलब्ध नहुने भएका हुन् ।’
‘मैत्रीपूर्ण खेल भन्दा हाम्रो आधिकारिक प्रतियोगिता साफ च्याम्पियनसिप हो । प्रशिक्षकलाई समेत सबै कुरा बुझाएर रोहित बाहिर गएका हुन् ।’ उनले थपे ।
नेपालले त्रिपुरेश्वरस्थित दशरथ रंगशालामा भारतसँग दुई मैत्रीपूर्ण खेल खेल्नेछ। मैत्रीपूर्ण खेल भदौ १७ र २० (सेप्टेम्बर २ र ५) मा हुनेछ।
राष्ट्रिय टिमका व्यवस्थापक मधुसुदन उपाध्यायले रोहित राष्ट्रिय टिमको क्याम्पमा नरहेको बताए । उनले भने, 'रोहित हामीसँग क्याममा छैनन् । विदामा छन् । इन्डोनेसिया गएका छन् । अहिलेसम्म मैत्रीपूर्णको लागि आउने नआउने टुंगो छैन ।'
रोहित राष्ट्रिय टिमका महत्वपुर्ण सदस्य हुन् । पर्सिजामा डिफेन्सिभ मिडफिल्डरको रुपमा खेलिरहेका उनी पछिल्लो समय राष्ट्रिय फुटबल टिममा सेन्टर डिफेन्सको भुमिकामा देखिएका थिए ।
उनकै प्रेरणादायी प्रर्दशनमा नेपालल गतृ चैतमा सम्पन्न थ्री नेसन्स कपको उपाधि उचालेको थियो । उनी प्रतियोगिताकै सर्वोत्कृष्ट खेलाडी घोषित भएका थिए ।
भारतविरुद्धको मैत्रीपूर्ण खेलमा नेपाललाई रोहितको अभाव खड्कने देखिन्छ । तर रोहितले साफका लागि आफुलाई प्रतिबद्ध राख्न चाहेको दाजु रबिन्दले बताए ।
'क्वारेन्टाइनको नियमले गर्दा समेत गाह्रो भयो । नत्र रोहित भारतविरुद्ध खेल्ने सम्भावना थियो ।' उनले भने, 'कोभिडको पछिल्लो अवस्थाले विदेशी लिग खेल्ने खेलाडीलाई धेरै समस्या बनाएको छ ।'
माल्दिभ्समा आयोजना हुने साफ च्याम्पियनसिपको तयारीका लागि नेपाल र भारतले मैत्रीपूर्ण खेल खेल्न लागेको हो।
साफ च्याम्पियनसिप अक्टोबर १ देखि १६ (असोज १५ देखि ३०) गतेसम्म आयोजना हुनेछ।
