कोरिया चम्किदा इन्टरको जित

एजेन्सी । जोक्विन कोरिया डेब्यु खेलमै चम्किएपछि इन्टर मिलानले सिरि ए फुटबलमा शानदार जित निकालेको छ ।

शुक्रबार राति इन्टर मिलानले भिरोनालाई ३–१ गोल अन्तरले पराजित गरेको खेलमा कोरियाले डेब्यु खेलमै दुई गोल गरे ।

वैकल्पिक खेलाडीको रुपमा मैदान छिरेका उनले ८३ औं मिनेट र इन्जुरी समयमा गोल गरेका थिए ।

खेलमा अग्रता घरेलु टोली भिरोनाले १५ औं मिनेटमा इभान इलिकको गोलबाट लिएको थियो । दोस्रो हाफको सुरुवातमै लौटारो मार्टिनेजले इन्टरका लागि बराबरी गोल फर्काएका थिए ।

मार्टिनेजको स्थानमा ७४ औं मिनेटमा मैदान छिरेका कोरियाले शानदार खेल प्रर्दशन गरे । उनी लोनमा लाजियोबाट इन्टर आएका हुन् ।

इन्टरले सिजनको पहिलो खेलमा जिरोनालाई ४–० गोल अन्तरले पराजित गरेको थियो । साविक विजेता इन्टरले दुई खेलबाट ६ अंक सहित शीर्ष स्थान कब्जा गरेको छ । भिरोना अंक विहिन हूँदै तालिकाको रेलिगेशन जोनमा छ ।