काठमाडौं । भारतीय राष्ट्रिय भलिबल टिमका कप्तान बिनित कुमारले नेपाली खेलाडी एसियन गेम्ससम्म जान सक्ने सम्भावना रहेको बताएका छन् ।
आरबीबी एनभीए क्लब च्याम्पियनसिप खेल्न नेपाल आएका बिनितले सो कुरा बताएका हुन् ।
उनले नेपाली खेलाडी राम्रो भएको बताउँदै बढी भन्दा बढी प्रतियोगिता खेलेको खण्डमा नेपाल एसियन गेम्समा जानसक्ने उल्लेख गरे ।
‘नेपालको टिम एसियन गेम्समा जानसक्छ । खेलाडीहरु राम्रा छन् । प्रतियोगिता बढी खेल्न, आधारभुत रुपमा काम गर्न बढी जरुरी छ । यदि उनीहरुले बढी प्रतियोगिता खेल्यो भने थाहा हुन्छ, के नयाँ टेक्निक आएको छ, कसरी खेल्नुपर्छ भनेर । बाहिरबाट नयाँ प्रशिक्षक हायर ग¥यो भने नेपाली टिमले खेल्नसक्छ ।’ उनले भने ।
बिनित कुमारकै उत्कृष्ट प्रर्दशनमा हेल्प नेपालले आरबीबी एनभीए च्याम्पियनसिपको उपाधि उचालेको थियो । साथै उत्कृष्ट प्रर्दशन गरेका बिनित प्रतियोगिताको सर्वोत्कृष्ट खेलाडी घोषित भएका थिए ।
उनले अरु टिमभन्दा हेल्प नेपाल बलियो टिम भएको र सोचेको कुरा पुरा भएको बताए ।
‘हाम्रो टिम सुरुबाट नै अरुभन्दा बलियो पनि थियो । यहीं सोचेको पनि थियौ । धेरै खुशी लागेको छ ।’ उनले भने ।
हेल्प नेपालका अर्का भारतीय खेलाडी रोहित कुमार पनि एक उत्कृष्ट खेलाडी हुन् । २४ वर्षे युवा खेलाडी रोहितले पनि एसियन गेम्स खेलिसकेका छन् ।
उनले नेपालको तुलनामा भारतमा धेरै प्रतियोगिताहरु हुने बताए ।
‘यता खेलाडीको हाईट कम छ । उता भारतमा खेलाडीको हाईट ठूलो छ । उता भारतमा प्रतियोगिता बढी हुन्छ । यता म पहिलोपटक आएको हुँ । धेरै राम्रो लागेको छ । खेलाडीहरु राम्रो छन् । धेरै फरक त छैन तर उता बढी प्रतियोगिता हुन्छन् ।’ उनले भने ।
भारतमा रेलवेका जागिरे रोहित राष्ट्रिय टिमका खेलाडी समेत हुन् ।
अर्का खेलाडी विकास कुमारले नेपालका समर्थकको प्रशंसा गर्दै नियम तथा सिस्टम राम्रो भएको बताए ।
‘म ४ वर्षदेखि निरन्तर आइरहेको छु र जितिरहेको पनि छौ । जित्दा राम्रो लागेको छ । नेपाल राम्रो छ । यहाँको समर्थक राम्रो छ । यतिमात्र फरक हो उताको खेलाडीको हाईट राम्रो छ । नेपालमा हाईट कम छ । यताको नियम राम्रो छ र उताको पनि सिस्टम राम्रो छ ।’ विकासले बताए ।
प्रतियोगितामा उत्कृष्ट प्रर्दशन गरेका विकास उत्कृष्ट सेटर चुनिएका थिए । उनी भारतमा रेलवे टिममा कार्यरत छन् ।
उनीहरुकै उत्कृष्ट प्रर्दशनमा हेल्प नेपालले पाँचौं संस्करणको राष्ट्रिय पुरुष तथा महिला भलिबल प्रतियोगिताको उपाधि जितेको थियो ।
