भरतपुर मेट्रोको पहिलो जित

काठमाडौं । भरतपुर मेट्रो खेलकुद परिषदले पाँचौ संस्करणको आरबीबी एनभीए राष्ट्रिय महिला तथा पुरुष क्लब लिग भलिबल च्याम्पियनसिपको महिलातर्फ पहिलो जित निकालेको छ ।

त्रिपुरेश्वरस्थित राखेपको कर्भडहलमा सोमबार ढोरपाटन स्पोर्ट्स क्लबलाई ३-० को सेटमा पराजित गर्दै भरतपुरले पहिलो जित निकालेको हो ।

पहिलो जित निकाल्ने क्रममा भरतपुरले ढोरपाटनमाथि २५-२१ , २५-१२ र २५-१३ को सेटमा जित निकालेको हो ।

यससँगै भरतपुरले ३ खेलपछि पहिलो जित निकालेको हो । भरतपुरले ४ खेलमा ३ अंक जोडेको छ ।

ढोरपाटनको यो लगातार पाँचौ हार हो ।

प्रतियोगितामा पुरुषतर्फ ७ टिम र महिलातर्फ ६ टिमले प्रतिस्पर्धा गरिरहेका छन् । लिगको शीर्ष दुई टिमले उपाधिका लागि खेल्ने छन् ।

लिगको महिला र पुरुष विजेताले ३ लाख नगद प्राप्त गर्ने छन् । यस्तै उपविजेताले १ लाख ५० हजार प्राप्त गर्दा तेस्रोले ७६ हजार र चौंथोले ३७ हजार ५ सय पाउने संघले जनाएको छ ।

प्रतियोगिताको सर्वाेत्कृष्ट महिला र पुरुष खेलाडीले जनही २५ हजार पाउनेछन् । उत्कृष्ट लिबेरो, स्पाइकर, ब्लकर, सर्भर, सेटर र प्रशिक्षकले जनही १० हजार पाउनेछन् ।