इलाम खुल्ला भलिबलको सेमिफाइनल समिकरण पूरा

नमिन ढकाल

इलाम । इलाममा जारी दोस्रो संस्करणको इलाम आमन्त्रण खुल्ला पुरुष भलिबलको सेमिफाइनल समिकरण पूरा भएको छ ।

अब शनिबार हुने पहिलो सेमिफाइनलमा समूह 'ए' को विजेता त्रिभुवन आर्मी क्लब र समूह 'बी को उप विजेता नेपाल पुलिसबीच प्रतिस्पर्धा हुनेछ ।

दोस्रो सेमिफाइनलमा समूह 'बी' को विजेता एपीएफ र समूह 'ए' को उपविजेता विमान ट्रेडर्स विर्तामोडबीच प्रतिस्पर्धा हुनेछ ।

डिफेन्डिङ च्याम्पियन गण्डकी प्रदेश भने समूह चरणबाटै बाहिरिएको छ ।

इलामको ठुलो टुडिखेलमा शुक्रबार विभागीय टोली आर्मीसँग ३–१ को सेटमा पराजित भएपछि गण्डकीको यात्रा समूह चरणमै समाप्त भएको हो ।

आर्मीले गण्डकीलाई २५–१५, २५–१८, २१–२५ र २५–१९ ले पराजित गर्यो ।

प्रतियोगिताको विजेताले २ लाख रुपैयाँ प्राप्त गर्नेछन् । दोस्रो हुने टोलीले १ लाख तथा तेस्रो हुने टोलीले ५० हजार रुपैयाँ हात पार्नेछन् ।