फुटसल लिग गर्न टर्नपाईकसँग एन्फाको सम्झौता

काठमाडौं । 'ए' डिभिजन राष्ट्रिय फुटसल लिग प्रतियोगिताको लागि अखिल नेपाल फुटबल संघ (एन्फा) ले टर्नपाईक इभेन्ट प्रालिसँग सम्झौता गरेको छ ।

एन्फाले राष्ट्रिय फुटसल लिगको विवरण सार्वजनिक गर्ने तथा प्रतियोगिताको व्यापार प्रबन्धक र व्यवस्थापनको लागि टर्नपाईकसँग आइतबार सम्झौता गरेको हो ।

एन्फाको फुटसल कमिटिका सयोजक रत्न कुमार श्रेष्ठ र टर्नपाईकका सीईओ उकेश लोहनीले सम्झौता पत्रमा हस्ताक्षर गरे ।

सम्झौता अनुसार टर्नपाईकले एन्फालाई २९ लाख उपलब्ध गराउने छ ।

सम्झौतापछि बोल्दै एन्फाका अध्यक्ष कर्मा छिरिङ शेर्पाले यसलाई ऐतिहासिक सम्झौताको रुपमा लिएको बताए ।

'सम्झौतालाई ऐतिहासिक रूपमा हेरेको छु । अन्तिम चरणको खेल पोखरामा गर्ने छौँ । प्रतियोगिता आयोजना गर्न इरानले सहयोग गर्ने कुरा भएको छ,' उनले भने, 'प्रतियोगितापछि खेलाडी छनोट गरेर बाहिर खेल्न पठाउने छौँ । हामी महिला फुटसलको राष्ट्रिय च्याम्पियनसिप गर्ने तयारीमा समेत छौँ ।'

टर्नपाईकका उकेशले प्रतियोगिता राष्ट्रिय टेलिभिजनबाट लाईभ गर्ने योजना रहेको बताए ।

'हामी मार्केटिङ एजेन्सीको रुपमा आबद्द हुदै आएको थियौं । सोही अनुसार अहिलेको एन्फाको भिजन अनुसार जोडिएका छौँ,' उनले भने,'खेल लोकप्रिय बनाउन मद्दत गर्ने छौँ । राष्ट्रिय टिभीबाट प्रत्यक्ष प्रशारण गर्छौ ।'

एन्फाको फुटसल संयोजक श्रेष्ठले प्रतियोगिताको अन्तिम तयारी भईरहेको बताए । एएफसीबाट मान्यता प्राप्त कभर्डहल भएकोले प्रतियोगिता पोखरामा गर्न लागिएको उनले बताए ।

फुटसलको 'ए' डिभिजन लिग बैशाख २५ देखि जेठ १५ सम्म पोखरामा संचालन हुनेछ ।

एन्फा फुटसल कमिटिले आयोजना गर्ने लिगमा कुल १० टिमले प्रतिस्पर्धा गर्ने छन् । जसमा बागमती प्रदेशबाट ४ टिम तथा प्रदेश-१ र गण्डकी प्रदेशबाट २/२ टिम सहभागी हुने छन् । त्यस्तै प्रदेश-२ बाट एक टिम र लुम्बिनी, कर्णाली र सुदूरपश्चिमबाट संयुक्त एक टिम हुनेछ ।

लिगको फाइनल चरण खेल्ने टिमहरु छनोट खेलबाट छनोट हुने छन् ।

लिगका लागि प्रदेश-१ को छनोट खेलहरु चैत १ देखि ५ सम्म इटहरीमा हुनेछ । प्रदेश-२ को छनोट हेटौडामा चैत ८ देखि १२ सम्म संचालन हुनेछ ।

लुम्बिनी, कर्णाली र सुदूरपश्चिमको छनोट दाङमा चैत १९ देखि २३ सम्म हुनेछ ।

बागमतीको छनोट खेलहरु काठमाडौंमा चैत २५ देखि ३० सम्म हुनेछ ।

गण्डकीको छनोट खेलहरु पोखरामा बैशाख ३ देखि ७ सम्म संचालन हुनेछ ।

लिगमा 'ए', 'बी' र 'सी' डिभिजन क्लब, जिल्ला संघमा आबद्द क्लब तथा राष्ट्रिय खेलकुद परिषदमा आबद्द क्लबहरुले सहभागिता जनाउन पाउने छन्।

लिगको विजेताले १० लाख प्राप्त गर्दा उपविजेताले ५ लाख पाउने छन् ।

यस्तै उत्कृष्ट गोलकिपर, उत्कृष्ट विंगर, उत्कृष्ट डिफेन्डर, उत्कृष्ट प्रशिक्षक र इमर्जिङ खेलाडीले समान २५ हजार पाउने छन् ।

एन्फाले सहभागी हरेक टिमलाई १ लाख उपलब्ध गराउने छन् ।

प्रतियोगिताबाट नेपालको राष्ट्रिय फुटसल टोली चयन हुनेछ ।