इंग्ल्यान्डको पोल्टामा दोस्रो टेष्ट

एजेन्सी । पाहुना टोलि वेष्ट इन्डिजविरुद्धको दोस्रो टेष्ट इंग्ल्यान्डले जितेको छ ।

ओल्ड ट्राफोर्डमा सोमबार टेष्टको पाँचौं दिन इंग्ल्यान्डले वेष्ट इन्डिजलाई १ सय १३ रनले हराएको हो ।

दोस्रो टेष्टमा जित निकालेसँगै इंग्ल्यान्डले तीन खेलको सिरिजमा १-१ को बराबरी गरेको छ । पहिलो टेष्टमा इंग्ल्यान्ड ४ विकेटले पराजित भएको थियो ।

अब दुई टोलीबीचको अन्तिम तथा तेस्रो टेष्ट शुक्रबारबाट सुरु हुनेछ ।

घरेलु टोलीले दिएको ३ सय १२ रनको चुनौतिपूर्ण लक्ष्यसहित दोस्रो इनिङ्स थालेको वेष्ट इन्डिज अलआउट हुँदै १ सय ९८ रनमा समेटियो ।

इंग्ल्यान्डका बलरसामु वेष्ट इन्डिजका शाम्रह ब्रुक्सले ६२ तथा जेर्मिने ब्लाकवुडले ५५ रनको अर्धशतकीय इनिङ्स खेल्नु बाहेक अन्यले उलेख्य रन जोड्न सकेनन् । कप्तान जासन होल्डर ३५ रनमा आउट भए ।

इंग्ल्यान्डका स्टुवार्ड बोर्डले ३ विकेट लिए । यस्तै डम बेस, क्रिस वोक्स र बेन स्टोक्सले २/२ विकेट लिए ।

यस अघि इंग्ल्यान्डले दोस्रो इनिङ्समा ३ विकेटको क्षतिमा १ सय २९ रन जोड्दै इनिङ्स समाप्तिको घोषणा गर्दै वेष्ट इन्डिजलाई चुनौतिपूर्ण लक्ष्य दिएको थियो ।

दोस्रो इनिङ्समा इंग्ल्यान्डका लागि बेन स्टोक्सले अविजित रहदै ७८ रनको अर्धशतकीय इनिङ्स खेले । यस्तै कप्तान जोय रुटले २२ रन जोड्दा ओली पोपे १२ रनमा अविजित रहे ।

इंग्ल्यान्डका जाक क्रलीले ११ रन बनाए भने जोस बट्लर सुन्य रनमा आउट भए । वेष्ट इन्डिजका केमार रोचले २ विकेट लिए ।

यस अघि पहिलो इनिङ्समा इंग्ल्यान्डले ९ विकेटको क्षतिमा ४ सय ६९ रन बनाएको थियो ।

पहिलो इनिङ्समा इंग्ल्यान्डका लागि डम सिब्ले र बेन स्टोक्सले शतकीय इनिङ्स खेले । स्टोक्सले १ सय ७६ रनको शतकीय इनिङ्स खेल्दा सिब्ले १ सय २० रन बनाए ।

त्यस्तै जोस बट्लरले ४० रन जोड्दा डम बेस ३१ रनमा अविजित रहे । कप्तान जोय रुटले २३ र रोरी ब्रुन्सले १५ रन बनाए ।

वेष्ट इन्डिजका रोस्टन चेसले ५ तथा केमार रोचले २ विकेट लिए ।

पहिलो इनिङ्समा वेष्ट इन्डिजले अलआउट हुँदै २ सय ८७ रन बनाएको थियो । उसका लागि क्रेग ब्रेइथवेटले ७५ रनको अर्धशतकीय इनिङ्स खेल्दा शाम्रह ब्रोक्सले ६८ रन बनाएका थिए ।
यस्तै रोस्टन चेसले पनि ५१ रनको अर्धशतकीय इनिङ्स खेलेका थिए ।

इंग्ल्यान्डका स्टुवार्ड बोर्ड र क्रिस वोक्सले ३/३ विकेट लिएका थिए । साम करनले २ विकेट लिए ।