क्यानले खुल्ला प्रतिस्पर्धाबाट प्रशिक्षक छनोट गर्ने

काठमाडौं । नेपाल क्रिकेट संघ (क्यान)ले खुल्ला प्रतिस्पर्धाबाट राष्ट्रिय क्रिकेट टिमको प्रशिक्षक छनोट गर्ने भएको छ ।

राष्ट्रिय क्रिकेट टिमका प्रशिक्षक उमेश पटवालले राजीनामा दिएपछि रिक्त रहेको पदमा क्यानले खुल्ला प्रतिस्पर्धाबाट प्रशिक्षक छनोट गर्ने भएको हो ।

नेपालको राष्ट्रिय क्रिकेट टिम लामो समयदेखि मुख्य प्रशिक्षक विहिन छ । क्यानले झण्डै ६ महिनादेखि मुख्य प्रशिक्षकको खोजी गर्दै आएको छ ।

क्यानले यसअघि भारतीय मुलका प्रशिक्षक लालचन्द राजपुत राष्ट्रिय टिमको मुख्य प्रशिक्षक बनाउने तयारी गरेको थियो । तर अन्तिम समयमा लालचन्दले धोको दिएको भन्दै क्यानले खुल्ला दर्खास्त आह्वान गरेर प्रशिक्षक छनोट गर्ने लागेको हो ।

आईसीसी र एसीसीसंगको समन्व्यमा क्यानले अब खुल्ला प्रतिस्पर्धाबाट प्रशिक्षक छनोट गर्ने जानकारी दिएको छ ।

क्यानका सचिब अशोकनाथ प्याकुरेलले आईसीसीसंगको समन्व्यमा मुख्य प्रशिक्षकका लागि खुल्ला दर्खास्त आह्वान गर्ने तयारी भएको खेलपाटीलाई बताएका छन् ।

’प्रशिक्षकको खोजी खुल्ला रुपमा गर्ने सुरु देखिकै योजना हो । तर केही प्रशिक्षकसंग अनौपचारिक संवाद समेत नाम जोडेर बाहिर आएको देखे । तर खुल्ला प्रतिस्पर्धाबाट प्रशिक्षकको खोजी हुन्छ ।’ प्याकुरेलले भने, ’त्यसमा प्रक्रिया के हुने भन्ने हो । आईसीसीले समेत यसमा गर्नु पर्ने काम संगै लैजान जरुरी छ ।’

आईसीसी निलम्बनको लामो समय पार गर्दै क्यान गठन भएपनि क्रिकेटमा देखिने गरि काम हुन नसकेको धेरैको गुनासो छ ।

’धेरैले बिर्सनु भएको कुरा भनेको क्यान ससर्त फुकुवा भएको हो । हरेक कुरा गर्न क्यानले आईसीसीसंग समन्व्य गर्नु पर्छ । प्रशिक्षकको समेत कुरा अघि बढिसकेको छ । सायद बर्षा सकिदा नसकिंदै केही टुंगो लागिसक्छ ।’ प्याकुरेलले थपे ।

खुला प्रतिस्पर्धाबाट प्रशिक्षक खोज्न क्यान तयार रहेको र आईसीसीले तयार गर्ने मापदण्डका आधारमा दर्खास्त आह्वान गरिने प्याकुरेल बताउँछन् ।

’आईसीसीसंगको कुरा टुङ्गिने वित्तिकै त्यसलाई बाहिर ल्याउँछौं । कस्तो मापदण्ड राख्ने, कस्तो समिति बनाउने भन्ने आईसीसीसंग छलफलमा हुन्छ । क्यान तयार अवस्थामा छ । आईसीसी भर्खरै अघि बढ्न सुरु गरेको छ । उसको आफ्नै एजेण्डा भएको कारण काम अलि ढिलो हुँदै गएको हो ।’ प्याकुरेलले गरे ।

क्यान निलम्बनमा रहेको बेला राष्ट्रिय खेलकुद परिषद र आईसीसीसको सहमतिमा पटवाल एक वर्षको लागि नेपालको प्रशिक्षकमा अनुबन्धित भएका थिए । तर उनले आफ्नो सम्झौताको समय अवधि नसकिदै राजिनामा दिएका थिए ।

सम्झौता अवधि सकिन झन्डै ३ महिना बाँकी रहंदा पटवालले आफ्नो तलबको विषयमा असन्तुष्टि देखाउंदै आईसीसीमा राजिनामा बुझाएका थिए ।