एन्फा विवाद चर्किएसंगै प्रदेश बैठक आह्वान
काठमाडौं । अखिल नेपाल फुटबल संघ (एन्फा)काे नेतृत्व तहमा आन्तरिक विवाद चर्किएसंगै प्रदेश नम्बर १ ले प्रादेशिक कमिटिको बैठक बोलाएको छ ।
नेतृत्व तहमा विवाद चर्किएर वारपारकै अवस्था सिर्जना भएपछि प्रदेश नम्बर १ ले प्रादेशिक कमिटिको बैठक भोलि (सोमबार)का लागि बोलाएको छ ।
बैठक एन्फा अध्यक्ष कर्माछिरिङ शेर्पा र वरिष्ठ उपाध्यक्ष पंकज बिक्रम नेम्बाङ्गबीच देखिएको आन्तरिक द्धन्दकै एजेण्डामा केन्द्रित रहनेछ । नेम्बाङ्ग प्रदेश १ बाटै फुटबलको केन्द्रिय राजनीतिमा प्रतिनिधित्व गर्छन् । पछिल्लो समय नेतृत्वसंग उनको असन्तुष्टि मात्र चुलिएको छैन, दुवै बीच वारपारको लडाँई सुरु भएको छ ।
एन्फाको हरेक निर्णयमा नेम्बाङ्गले नेतृत्वबिरुद्ध फरक मत राख्दै आएका छन् । नेतृत्व आन्तरिक संकटमा परेको समय उनले फुटबलको सर्वोच्च निकाय फिफा, एएफसीमा उजुरी हाल्नेदेखि राजीनामानै मागेका थिए ।
वरिष्ठ उपाध्यक्षनै आफुबिरुद्ध निरन्तर आक्रमणमा उत्रिएपछि एन्फा अध्यक्ष शेर्पा नेम्बाङ्गलाई ‘माईनस’ गर्ने अवस्थामा पुगेका छन् । नेम्बाङ्गलाई वरिष्ठ उपाध्यक्ष बनाएर गल्ती गरेको बताउने गरेका शेर्पाले दिएको जिम्मेवारी समेत खोस्न सुरु गरेका छन् ।
गत बुधबार मात्र अध्यक्ष शेर्पाले नेम्बाङ्गले सम्हाल्दै आएको पदपूर्ती समिति र सदस्य समन्व्य समितिका संयोजकको जिम्मवारी खोस्दै क्रमश उपाध्यक्षद्धय शिक्षित पराजुली र वीरबहादुर खड्कालाई दिएका थिए ।
अध्यक्षसंग वरिष्ठ उपाध्यक्षको सम्बन्धमा दरार उत्पन्न भएपछि प्रदेश १ ले आन्तरिक बैठक बोलाएको हो । बैठकमा एन्फाभित्र देखिएको आन्तरिक विवाद, उपाध्यक्षले राख्दै आएका फरक मत सहित प्रदेश कमिटिको विधान, कार्यक्रम लगायतका एजेण्डा तय गरिएको छ ।
एन्फाका वरिष्ठ मानार्थ उपाध्यक्ष समेत रहेका प्रदेश कमिटिका अध्यक्ष किशोर राईले एन्फाभित्र देखिएको विवादका बिषयमा छलफल गर्ने एजेण्डा सहित प्रादेशिक कमिटिको बैठक आह्वान गरिएको खेलपाटीलाई बताए ।
‘जति बेला फुटबलमा समस्यामा पर्छ, त्यो बेला प्रदेश एकले भुमिका खेल्ने गरेको ईतिहास छ । सोही अनुसार फुटबलमा देखिएको विवाद समाधानमा पहल गर्न बैठक बोलाईएको हो ।’ राईले भने ।
नेतृत्वबिरुद्ध असन्तुष्टि जनाउँदै आएका नेम्बाङ्ग फुटबलको केन्द्रिय राजनीतिमा समस्या पर्न थालेका छन् । एन्फा अध्यक्ष शेर्पाबिरुद्ध फिफामा उजुरी गर्ने र राजीनामा माग्ने वरिष्ठ उपाध्यक्षको कार्यशैलीको विरोध गर्दै यसअघि गण्डकी प्रदेशका ८ जिल्लाले बिज्ञप्ती निकालेर विरोध गरेका थिए । एन्फाको केन्द्रिय कार्यसमितिमा समेत एक्लो जस्तै देखिएका नेम्बाङ्ग आन्तरिक प्रतिस्पर्धामै समेत पछाडी पर्न थालेका छन् ।
एन्फा राजनीतिमा शेर्पापछिको उत्तराधिकारीको रुपमा हेरिएका नेम्बाङ्गको नेतृत्वसंगको विवादले प्राप्त जिम्मेवारी खोसिएको मात्र छैन, उनका प्रतिस्पर्धी उपाध्यक्ष वीरबहादुर खड्काले थप जिम्मेवारी प्राप्त गरेका छन् ।
एन्फाभित्र कुनै समय नेम्बाङ्ग र खड्का वरिष्ठ उपाध्यक्षका प्रत्यासी थिए । खड्कालाई पछि राख्दै एन्फा अध्यक्ष शेर्पाले नेम्बाङ्गलाई वरिष्ठ उपाध्यक्षमा नियुक्त गरेका थिए । नेम्बाङ्ग वरिष्ठ उपाध्यक्षमा चयन भएसंगै खड्काले नेतृत्वसंग गम्भिर असन्तुष्टि जनाएका थिए ।
पछिल्लो समय नेतृत्वसंगको विवादले नेम्बाङ्ग रक्षात्मक अवस्थामा पुगेका छन् । गत बुधबार कार्यसमितिको आपतकालिन बैठकमा नेतृत्वबिरुद्ध मोर्चाबन्दी गरेको भन्दै वरिष्ठ उपाध्यक्ष नेम्बाङ्गलाई स्पष्टिकरण सोध्नुपर्ने माग उठेको थियो ।
उपाध्यक्ष खड्का सहितका कार्यसमितिका सदस्यले नेतृत्वबिरुद्ध फिफा, एएफसीमा उजुरी हालेको आरोपमा वरिष्ठ उपाध्यक्षलाई स्पष्टिकरण सोध्नुपर्ने माग गरेका थिए । कार्यसमिति बैठकमै वरिष्ठ उपाध्यक्षबिरुद्ध स्पष्टिकरणको माग उठेपछि नेम्बाङ्गलाई समर्थन गर्ने प्रदेश तथा जिल्ला आन्तरिक छलफलमा जुटेका छन् ।
प्रदेश नम्बर १ ले औपचारिक बैठकबाटै निर्णय गरेर अध्यक्ष र वरिष्ठ उपाध्यक्षबीचको सम्बन्ध सुधारको पहल गर्ने रणनीति तय गरेको छ । शेर्पासंग वरिष्ठ उपाध्यक्षको सम्बन्ध सुधार गर्दै फुटबल राजनीतिलाई पुरानै कोर्स अनुसार अघि बढाउने प्रदेश कमिटिको योजना छ ।
शेर्पा र नेम्बाङ्गकै नेतृत्वमा फुटबलमा शुद्धिकरण अभियान सुरु भएको थियो । तत्कालिन अध्यक्ष गणेश थापाको कार्यशैली र निर्णय प्रक्रियामा विमती राख्दै शेर्पा र नेम्बाङ्ग सहितको समुहले फुटबल बचाउ आन्दोलननै सुरु गरेको थियो ।
एन्फा परिवर्तनको नारालाई फुटबल राजनीतिमा स्थापित गर्न दुवै जना सफल भएपनि संस्थालाई अघि बढाउने बिषयमा फरmक ध्रुवमा बाँडिएका छन् ।
