एजेन्सी । कोरोना भाईरसको कारण एक वर्ष स्थगित भएको टोकियो ओलम्पिक तोकिएको नयाँ मितिमा नभए रद्द गरिने भएको छ ।
टोकियो ओलम्पिक आयोजक कमिटिका अध्यक्ष योशिरो मोरीले सन् २०२१ मा समेत आयोजना गर्न नसकिए प्रतियोगिता रद्द हुने बताएका छन् ।
कोरोनाको महामारी कायम रहेमा प्रतियोगिता फेरी सर्छ भन्ने प्रश्नमा अध्यक्ष मोरीले भने, 'हुँदैन । यदि त्यसो भए ओलम्पिक रद्द हुनेछ ।'
विश्व खेलकुदको कुम्भमेला ओलम्पिक सन् २०२१ को जुलाई २३ देखि अगस्ट ८ सम्म हुनेछ ।
यस अघि टोकियो ओलम्पिक यसै वर्षको जुलाई २४ देखि अगस्ट ९ सम्म हुने तय थियो । तर, कोरोना भाईरस विश्वभर महामारीको रुपमा फैलिएपछि ओलम्पिक प्रतियोगिता एक वर्ष सारिएको थियो ।
अध्यक्ष मोरीले कोरोनालाई जितेर ओलम्पिकको आयोजना गर्न सफल हुनेमा विश्वस्त रहेको समेत बताए । उनले आगामी वर्ष हुने ओलम्पिक मुल्यवान हुने पनि दाबी गरे ।
'यो ओलम्पिक अन्य ओलम्पिक भन्दा मूल्यवान हुनेछ । यदि हामीले यो लडाई जितेर अघि बढ्यौ भने,' उनले थपे,'हामी यसमा विश्वास गर्छौं । अन्यथा हाम्रो कठिन मेहेनत र प्रयासलाई पुरस्कृत गरिनेछैन ।'
यस्तै आगामी वर्ष आयोजना हुने भएपनि प्रतियोगिताको नाम 'टोकियो ओलम्पिक गेम्स २०२०' नै रहने भएको छ ।
अन्तर्राष्ट्रिय ओलम्पिक कमिटीले भिडियो कन्फ्रेन्सिङका माध्यमबाट राखेको बैठकमा ओलम्पिक टर्च टोकियो पुगिसकेकोले नाम नफेर्ने सहमति बनेको थियो ।
