न्यु समिट र भ्याली पब्लिक क्वार्टरफाइनलमा

काठमाडौं । न्यु समिट स्कुल र भ्याली पब्लिक स्कुल सातौं गोल्डेनपीक अन्तर बिद्यालय बास्केटबल प्रतियोगिताको सिनियर छात्रतर्फ  क्वार्टरफाइनलमा प्रवेश गरेका छन् ।

सरस्वतीनगर स्थित गोल्डेनपीकको कोर्टमा बुधबार भएको सिनियर छात्र तर्फको खेलमा न्यु समिटले काठमाडौं विद्याकुञ्जमाथि २१–१९को कठिन जित निकाल्यो । न्यु समिटका सशांक महर्जनले ११ स्कोरको योगदान दिएका थिए ।

सिनियर छात्र तर्फनै भ्याली पब्लिकले ग्रीनल्याण्डलाई ५५–४४को स्कोरमा पराजित गर्दा सुन्दर तामाङले १४ स्कोर गरे ।

सिनियरतर्फ ह्वीज किड्सले एपेक्समाथि ३६–३३ को स्कोरमा जित निकालेको छ । यसैगरी आयोजक गोल्डेनपीकले कन्सिलेशन माथि ५२–४५ को जित निकाल्दा गोपाल भण्डारी २२ स्कोर गरे ।

जुनियर तर्फ गोल्डेनपीकले बीएनएलाई १८–१०ले हराउँदा प्रवेश राईले १० स्कोर गरे । एन्जलहर्टले इडनब्रिजलाई १७–१५ले हराउँदा शेखर मल्लले ६ स्कोर गरे । जुनियर तर्फ ग्रीनल्याण्डले शेबलाई २१–१३ ले हराउँदा रुपेश अधिकारीले १० स्कोर गरेका थिए ।

दिपेश कार्कीको १२ स्कोरको मद्दतले लालीगुराँसले माउन्ट कैलाशलाई २३–१५ को स्कोरमा स्तब्ध बनायो ।