पुजन र सागरको विजयी सुरुआत

काठमाडौं । पुजन तण्डुकार र सागर लामाले प्रथम चामुण्डा गोकर्णेश्वर मेयर कप ओपन सिक्स रेड स्नुकर च्याम्पियनसिपमा शनिबार विजयी सुरुआत गरेका छन् ।

नेपाल विलियर्ड, स्नुकर तथा पुल संघको सहयोगमा चामुण्डा स्नुकर क्लबद्वारा आयोजित प्रतियोगितामा पुजनले प्रज्ज्वल शाक्यलाई ३–२ तथा सागरले अभिषेक खड्गीलाई ३–० को फ्रेममा पराजित गरे ।

जोरपाटीमा भइरहेको प्रतियोगिताको अन्य खेलमा सनोज खड्गी, प्रकाश स्वर्णकार, सनी छुकान, मन्जिल केसी, पुस्कर क्षेत्री, सम्पूर्ण शाह, सुन्सन श्रेष्ठ, सुमन तामाङ, आशिष सिंह, एडिन गुरुङ, बलबहादुर लामा, कृष्ण गुप्ता, निश्चल केसी र इराज श्रेष्ठ विजयी भए ।

विजेताले १ लाख ५० हजार, उपविजेताले ६० हजार र तेश्रो हुने दुई खेलाडीलाई जनही २० हजार नगद पुरस्कार दिइने छ । ७५ अंकसम्म सर्वाधिक ब्रेककर्तालाई ३० हजार तथा सो भन्दा मुनी सर्वाधिक ब्रेककर्तालाई १५ हजार नगदबाट पुरस्कृत गरिने छ ।

उत्कृष्ट खेलाडी, अनुशासित खेलाडी र उदीयमान खेलाडीलाई समान १०–१० हजार नगद प्रदान गरिने छ । १ सय ९२ खेलाडी सहभागी प्रतियोगिता फागुन १७ गतेसम्म चल्ने छ ।