नेपालका सुवास स्वर्ण नजिक

काठमाडौं । १३ औं दक्षिण एसियाली खेलकुद (साग) अन्तर्गत गल्फमा नेपालका सुवास तामाङ स्वर्ण नजिक पुगेका छन् ।

गोकर्ण फरेस्ट गल्फ कोर्समा जारी प्रतियोगिताको तेस्रो दिन बिहीबार सुवासले चार अन्डर ६८ खेले । ५४ होलको समाप्तिसँगै सुवासको कूल ११ अन्डर दुई सय पाँच स्कोर छ ।

सुवास दोस्रो स्थानमा रहेका नेपालकै निरज तामाङभन्दा सात स्ट्रोकले अगाडि छन् । निरजले कूल चार अन्डर दुई सय १२ स्कोर छ ।

बिहिबार निरजले एक अन्डर ७१ खेलेका थिए । तेस्रो स्थानमा रहेका बंगलादेशका मोहमद फराद र मोहमद शाहबुद्धिनको समान दुई अन्डर दुई सय १४ स्कोर छ । तेस्रो दिन फरादले चार अन्डर ६८ र शाहबुद्धिनले तीन अन्डर ६९ खेलेका थिए ।

पुरुष टिम इभेन्टमा पनि नेपाल स्वर्ण नजिक पुगेको छ । टिम स्पर्धामा नेपालले कूल २१ अन्डर ६ सय २७ स्कोर खेलेको छ । दोस्रो स्थानमा रहेको बंगलादेशको एक अन्डर ६ सय ४७ स्कोर छ । तेस्रो स्थानमा रहेको श्रीलंकाको ६ सय ५४ स्कोर छ ।

यसैगरी महिला एकलमा श्रीलंकाकी ग्रेस यातावारा स्वर्ण नजिक पुगेकी छन् । ग्रेसको कूल तीन ओभर दुई सय १९ स्कोर छ । बिहिबार उनले दुई ओभर ७४ खेलेकी थिईन् ।

दोस्रो स्थानमा रहेकी तानिया मिनालको २४ ओभर दुई सय ४० स्कोर छ । उनले तानियालाई २१ स्ट्रोकले पछि पारेकी छन् । तेस्रो स्थानमा रहेकी श्रीलंकाकै थुहासिनी सेल्भाथानामको २५ ओभर दुई सय ४१ स्कोर छ ।

महिलाको टिम स्पर्धामा पनि श्रीलंका अगाडी छ । श्रीलंकाले कूल २१ ओभर चार सय ५३ स्कोर खेलेको छ ।

दोस्रो स्थानमा रहेको बंगलादेशको ५४ ओभर चार सय ८६ स्कोर र तेस्रो स्थानमा रहेको नेपालको ७४ ओभर पाँच सय ६ स्कोर छ ।