साग विशेष : सागमा ‘डेब्यु’ गर्दै बिच भलिबल

काठमाडौं । एक दशकभन्दा अगाडी देखिनै नेपालमा बिच भलिबलको सुरुवात भएको हो । महिला, पुरुष दुवै स्पर्धामा नेपालले अन्तराष्ट्रिय प्रतियोगिता समेत खेल्यो । तर, सबै प्रतियोगितामा नेपाल पदक विहिन रह्यो ।

सन् २०१४ मा माल्दिभ्समा भएको एभिसी सेन्ट्रल जोन बिच भलिबलमा राष्ट्रिय टिमकी सदस्य कमला पुन र कोपिला उप्रेतीको जोडीले नेपाललाई पहिलोपटक स्वर्ण पदक दिलाएका थिए ।

यो नै नेपाली बिच भलिबलको अन्तराष्ट्रिय उपाधि हो ।

सन् २०१९ सम्म आईपुग्दा नेपालले सो सफलता दोहोर्याउन सकेको छैन ।

विभिन्न अन्तराष्ट्रिय प्रतियोगितामा सहभागि हुँदै आएको नेपालले सागको १३ औं संस्करणसम्म आईपुग्दा एकपटक पनि दक्षिण एसियाली खेलकुदमा सहभागिता जनाएको छैन ।

पुरुष तथा महिला बिच भलिबल टिमले पहिलोपटक नेपालमा हुन लागेको १३ औं सागमा सहभागिता जनाउने भएका छन् । घरेलु मैदानमा हुने लागेको प्रतियोगितामा स्वर्ण पदकका लागि नेपाली टिमले प्रतिस्पर्धा गर्नेछ ।

तयारी -
१३ औं सागलाई लक्षित गर्दै नेपालको टिमले भदौबाट लगनखेलस्थित सैनिक शारीरिक तथा तालिम केन्द्रमा बन्द प्रशिक्षणको सुरुवात गरेको थियो ।

सागको तयारीका लागि गत महिना पुरुष तथा महिला टोली झन्डै दुई साता वैदेशिक प्रशिक्षण र मैत्रीपूर्ण खेलका लागि श्रीलंका पुगेका थिए ।

उनीहरुले श्रीलंका र पोल्याण्डको टिमसँग मैत्रीपूर्ण खेलका साथै प्रशिक्षण गरेका थिए । सो मैत्रीपूर्ण खेलमा पुरुष टिमले दुई जित र महिला टिमले हार व्यहोरेको थियो ।

नेपालको कृत्रिममा कोर्टमा प्रशिक्षण गरेका विच भलिबल खेलाडीले श्रीलंकाको राम्रै कोर्टमा अभ्यास गर्न पाएका थिए ।

प्रशिक्षक सुदेश रिमालले खेलाडीलाई प्रशिक्षणका लागि उपयुक्त कोर्ट नहुँदा मैत्रीपूर्ण खेलमा नतिजा राम्रो नआएको बताए ।

‘खेलाडीलाई जस्तो कोर्टमा प्रशिक्षण गराउनुपर्ने हो, त्यो पाएका छैनौ । उनीहरुलाई कृत्रिम कोर्टमा प्रशिक्षण गराएका छौ । त्यसैले श्रीलंकामा नतिजा राम्रो आएन,’ उनले थपे, ‘तर सबै टिमसँग नजिक–नजिककै अंक ल्याएका थियौ ।’

उनले बिच भलिबलमा श्रीलंका र नेपालको वातावरणमा धेरै फरक भएको बताए ।

‘बिच भलिबलमा हाम्रो र श्रीलङ्काको वातावरणमा धेरै फरक छ । उनीहरुले प्रतियोगितामा खेल्ने जस्तो कोर्टमा प्रशिक्षण गरिरहेका छन् तर हामी भने कृत्रिममा खेलिरहेका छौ,’ उनले थपे, ‘त्यहाँको बालुवा र यहाँको फरक छ ।’

प्रशिक्षक रिमालले नेपालमा काम गर्दै गर्दा भौतिक पूर्वाधारले ट्रेनिङमा केही समस्या आएको भएपनि तयारी राम्रो रहेको बताए ।

स्वर्णका लागि तयारी गरिरहेको बिच टिमको प्रशिक्षण अन्तिम चरणमा पुगेको छ ।

नेपालको बलियो प्रतिस्पर्धीको रुपमा श्रीलंकालाई हेरिएको छ । मैत्रीपूर्ण खेलमा श्रीलंकासंग पराजित नेपाली टिमले बलियो प्रतिद्वन्दीलाई हराएर उपाधि जित्नु पर्ने चुनौती छ ।

पदकको सम्भावना -

नेपालले भदौंबाट सागको तयारी गरेको थियो । झन्डै दुई साता श्रीलंकामा नेपाली टिमले प्रशिक्षण तथा मैत्रीपूर्ण खेल खेलेको थियो ।

बलियो टिम श्रीलंकासंग सागमा प्रतिस्पर्धा हुने भएकाले नेपालको स्वर्ण पदकको सम्भावना कमजोर देखिन्छ । घरेलु मैदानमा हुने प्रतियोगितामा नेपालको पदकको सम्भावना धेरै रहेको प्रशिक्षक रिमालले बताउँछन् ।

‘प्रतियोगिता घरेलु मैदानमा आयोजना हुँदैछ । त्यसैले पदकको सम्भावना छ । यस्तै श्रीलंकाको राष्ट्रिय टिमसँग मैत्रीपूर्ण खेलमा हारेपनि एकमा जित निकालेका थियौ ।’

बिच भलिबलमा नेपालबाट सबै इन्डोर खेलका खेलाडीले प्रतिस्पर्धा गर्नेछन् । सबै खेलाडी उत्कृष्ट भएकाले पदकको सम्भावना प्रवल देखेको रिमाल बताउँछन् ।

बिच भलिबल टिम -

(पुरुष)
मान बहादुर श्रेष्ठ
दिल सुनुवार
सञ्जु विक्रम शाह
राजु विक

(महिला )
बिनिता बुढाथोकी
कोपिला उप्रेती
मनिषा चौधरी
नेबिका चौधरी