नेपाल २ सय ८ रनले पराजित

काठमाडौं । पाहुना टिम मेरिलेबोन क्रिकेट क्लब (एमसीसी) विरुद्धको तीन दिवसीय (फस्ट क्लास) क्रिकेटमा नेपाल २ सय ८ रनको फराकिलो अन्तरले पराजित भएको छ ।

टियु क्रिकेट मैदानमा शुक्रबार एमसीसीले दिएको ३ सय ९३ रनको फराकिलो लक्ष्य पछ्याएको नेपाल ४० ओभर ३ बलमा अलआउट हुँदै १ सय ८४ रनमा समेटियो ।

लन्च ब्रेकसम्म ९ ओभरमा १ विकेट गुमाएर ५१ रन बनाएको नेपालले टी ब्रेकसम्म ८ विकेट गुमाएर १ सय ४४ रन बनाएको थियो । त्यसपछि थप ४० रन जोड्दा नेपालले बाँकि दुई विकेट गुमाएको थियो ।

नेपालका लागि सोमपाल कामीले ५१ रनको अर्धशतकीय इनिङ्स खेलेपनि टिमलाई जित दिलाउन सकेनन् । 

यस्तै राजु रिजालले ३१ रन जोड्दा सन्दीप लामिछानेले २५ रन जोडे । आरिफ शेख १९ रनमा आउट हुँदा करण केसीले १८ रन बनाए । शरद भेषवाकरले १४ रन तथा कप्तान ज्ञानेन्द्र मल्लले ६ रन बनाएर आउट भए । दिपेन्द्र सिंह ऐरी, पवन सर्राफ र विनोद भण्डारी सुन्य रनमा आउट भए ।

एमसीसीका ओलिभरले ५ विकेट लिए । एलेक्स थम्पसनको नाममा ३ विकेट रह्यो ।

यसअघि दोस्रो इनिङ्सको पहिलो सेसनमा ३६ ओभरमा ६ विकेट गुमाएर १८१ रन जोडेर एमसीसीले इनिङ्स समाप्तिको घोषणा गरेको थियो ।

एमसीसीका लागि दोस्रो इनिङ्समा बिली गोडलम्यानलाई ३९ , टम वेस्ट्लीले ३४ तथा एड योङले ३१ रन बनाए । यस्तै विल रोड्सले ३० रन बनाए ।

नेपालका करण केसीले ३ विकेट लिए । यस्तै सोमपाल कामी, ललित नारायण राजवंशी र पवन सरार्फले १-१ विकेट लिए ।

यसअघि एमसीसीले पहिलो इनिङ्समा ३ सय ६४ रन बनाएको थियो । पहिलो इनिङ्समा एमसीसीका लागि चार खेलाडीले अर्धशतक बनाए ।

एमसीसीका विल रोड्स ७३ रनको अर्धशतकीय इनिङ्स खेल्दा विल भान्डेर्सपारले ५३ रनको र्धशतकीय इनिङ्स खेले । यस्तै मिल्स हाम्मोन्डले ५२ रनको अर्धशतकीय इनिङ्स खेले ।

यासिर अराफाट ६५ रनमा अविजित रहे । टम वेस्ट्लीले ३९ रन जोड्दा एलेक्स थोम्पसनले ३० रन बनाए ।

नेपालका सन्दीप लामिछाने र करण केसीले ३/३ विकेट लिए । यस्तै सोमपाल कामी र शरद भेषवाकरले २/२ विकेट लिए ।

नेपालले भने पहिलो इनिङ्समा १५३ रन बनाएको थियो । पहिलो इनिङ्समा नेपाल ४४ ओभर ४ बलमा १५३ रन जोड्दा अलआउट भएको थियो ।

खराब ब्याटिङ गरेको नेपालले लन्च ब्रेकसम्म १८ रन जोड्दा महत्वपूर्ण तीन विकेट गुमाएको थियो । नेपालका कप्तान ज्ञानेन्द्र मल्ल सुन्य रनमा आउट हुँदा राजु रिजालले ८ रन जोडे । यस्तै शरद भेषवाकर ४ रनमा आउट भए ।

यस्तै नेपालले ३१ रन जोड्दा पाँच विकेट गुमाएको थियो । तर, विनोद भण्डारी र सोमपाल कामीले अर्धशतकीय साझेदारी गर्दै नेपालको इनिङ्स उकासेका थिए ।

विनोदले ३६ रन बनाए भने सोमपाल २६ रनमा आउट भए ।

त्यसपछि आएका सन्दीप लामिछानेले आक्रामक ब्याटिङ गर्दै सर्वाधिक ३९ रन बनाए । उनले ४ छक्का र २ चौका प्रहार गरे ।

सन्दीपले अन्तिम विकेटको लागि ललित नारायण राजवंशीसँग ४२ रनको साझेदारी गरे । ललित सुन्य रनमा आउट भए ।

यस्तै नेपालका आरिफ शेखले १० रन बनाए ।

एमसीसीका यासिर अराफात र एलेक्स थम्पसनले समान ३/३ विकेट लिए ।

नेपालले करिब १४ वर्षपछि घरेलु मैदानमा फस्ट क्लास क्रिकेट खेलको हो । अब नेपालले एमसीसीसँग शनिबार टी-ट्वान्टी क्रिकेट खेल्नेछ ।

यसअघि भएको एकदिवसीयमा नेपालले एमसीसीलाई ५ विकेटले हराएको थियो ।

नेपाली क्रिकेट विकासको लागि तयार गरेको लिगेसी टुर अन्तर्गत एमसीसी टिम नेपाल आएका हुन् । नेपाली क्रिकेट विकासको लागि एमसीसीले गत वर्षको साउनमा लिगेसी टुरको घोषणा गरेको थियो ।