काठमाडौं । पछिल्लो एक महिना नेपालले उमेर समूहको साफ यू–१८ च्याम्पियनसिपमा अप्रत्यासित नतिजा आत्मसाथ गर्यो ।
दुई पटकको च्याम्पियन नेपाल घरेलु मैदानमा समूह चरणबाटै बाहिरियो ।
उपाधिमा ह्याट्रिक गर्ने लक्ष्य लिएको नेपालले समूह चरणमा भुटानसंग ४–० को लज्जास्पद हार ब्यहोरेको थियो ।
अप्रत्यासित नतिजासंगै मुख्य प्रशिक्षक चेतनारायण श्रेष्ठले नैतिकताको आधार भन्दै पदबाट राजिनामानै दिए । अन्य दुई सहायक प्रशिक्षक समेत पदबाट हटाईए ।
साफमा फितलो नतिजा आत्मसाथ गरेको नेपालले आज (बुधबार) बाट इरानमा सुरु हुने एएफसी यू–१९ छनोट च्याम्पियनसिप खेल्दैछ ।
नेपालले आयोजक इरानसँगै युएई र कीर्गिस्तानसंग प्रतिस्पर्धा गर्नेछ ।
प्रतियोगिता हेर्न एन्फाले मुख्य प्रशिक्षकमा मेघराज केसीलाई जिम्मेवारी दिएको छ । सहायक प्रशिक्षकमा प्रकाश अर्याल र गोलरक्षक प्रशिक्षकमा उज्जवल मानन्धर भने मेघराजकै रोजाईका छन् ।
मेघराज उनै प्रशिक्षक हुन्, जसले सन् २०११ म बेलायती प्रशिक्षक ग्राहम रोबर्ट्ससंग राष्ट्रिय फुटबल टिम हेरेका थिए ।
त्यो समय नेपालले फिफा वरियतामा सबैभन्दा उच्च वरियता १ सय २६ औ स्थान हासिल गरेको थियो ।
एक हिसावले मेघराजले लामो समय सिनियर स्तरको फुटबल टिम हेरे । तर राष्ट्रिय टिममा उनको भूमिका सधै सहायकनै रह्यो ।
उनै अनुभवी प्रशिक्षक मेघराजलाई एन्फाले नयाँ जिम्मेवारी दिएको छ । मुख्य प्रशिक्षकको रुपमा यू–१९ को जिम्मेवारी सुम्पिएको हो ।
उमेर समूहमा लर्खराएको नेपालको प्रर्दशन उकास्ने लक्ष्य सहित मेघराजले टिमको नेतृत्व लिएका छन् । तर पछिल्लो समय ओरालो लागेको उमेर समूहको प्रर्दशन र नतिजा उकास्न उनलाई सहज भने पक्कै हुने छैन ।
युवा टिमले दशै लगत्तै तयारी सुरु गरेको थियो । केसी प्रारम्भिक रुपमा ४८ खेलाडी बोलाएका थिए । त्यसैबाट उनले अन्तिम टिम तयार गरेका थिए ।
सागको तयारीमा रहेका खेलाडी सहित साफ यू–१८ खेलेका अधिकांश खेलाडी उनको साथमा छन् ।
तर, उनले तयारीको समय भने छोटो पाए । करिब २० दिनमा उनले एएफसीको छनोट खेल्ने टिम तयार पारेका हुन् ।
‘सुरुमा खेलाडीको क्षमता हेरेको छु । त्यसपछि विपक्षी अनुसार खेल्न सक्ने खेलाडीलाई प्राथमिकतामा राखेको छु । विपक्षी टिम निकै बलिया छन् । उनीहरुलाई टक्कर दिन सक्ने खेलाडी छनोट गरेको छु ।’ खेलाडी छनोटबारे प्रशिक्षक केसीले भने ।
युवा टिमले करिब २० दिन सातदोबाटोस्थित एन्फा कम्लेक्समा तयारी गर्यो । तर नेपाललाई कृत्रिम मैदानमा गरेको तयारीको लाभ मिल्ने छैन ।
कृत्रिम मैदानमा तयारी गर्दै आएको नेपाली टिमले घाँसे मैदानमा प्रतिस्पर्धा गर्नेछ । जसको असर साफमा देखिएको थियो ।
साफमा पराजयको एक कारण कृत्रिम मैदानको अभ्यासनै रहेको तत्कालिन प्रशिक्षक चेतनारायण श्रेष्ठले भनेका थिए ।
‘तयारी कृत्रिम मैदानमा भयो । त्यसैले खेलाडी खेल्न सकेनन् ।’ खेलाडीको प्रर्दशनलाई लिएर उनको प्रतिक्रिया थियो ।
एसियाली क्षेत्रको ठुलो प्रतियोगिता खेल्न लागेको नेपालको तयारी कृत्रिम मैदानमै भएको छ । जसको असर खेलमा देखिन सक्नेछ ।
समूह डीमा रहेको नेपालले आज (बुधबार) युएईसँग खेल्दै प्रतियोगिताको सुरुवात गर्नेछ ।
दोस्रो खेलमा नेपालले शुक्रबार इरानसँग र शनिबार बलियो प्रतिद्वन्दी कीर्गिस्तानसंग खेल्नेछ ।
एघार समुहका शीर्ष टिम सिधै फाईनल चरणमा छनोट हुनेछन् । उत्कृष्ट ४ टिम समेत प्रतियोगितामा छानिने छन् । आयोजकको हिसाबले उज्वेकिस्तान सिधै छनोट हुनेछ ।
मेघराजले कुनै समय एन्फाको पहिलो ब्याजका खेलाडी हेरेका थिए । उनले सुरुवाती ३ ब्याजसम्म विभिन्न उमेरका खेलाडी हेर्न भ्याए ।
तर पछिल्ला १० बर्ष भने उनी क्लब फुटबलमा रमाए ।
यस दौरान उनले हिमालयन शेर्पादेखि फ्रेन्ड्स क्लब अनि त्रिभुवन आर्मी हुदै थ्री स्टार क्लबसम्म सम्हाले । सिनियर खेलाडीको नेतृत्व गरिरहेका मेघराजलाई उमेर समुहका खेलाडीबाट नतिजा निकाल्नुपर्ने चुनौती छ ।
तर उनी टिम हेर्न खासै गाह्रो नहुने बताउँछन् ।
‘धेरै समयपछि उमेर समुहको टिम हेरेको छु । सानो ठाउँ छ, खेलाडी र फुटबलमै छु । त्यसैले सबैसंग निरन्तर सम्पर्कमा छु । आफुपनि उत्साहित छु र खेलाडीमा समेत उत्साह भेटेको छु । खेलाडीको उत्साहलाई सदुपयोग गर्दै उच्चस्तरको टिमलाई टक्कर दिने टिम तयार पारेका छु ।’ उनले भनेका छन् ।
‘धेरै समय प्रशिक्षकको क्षेत्रमा रहेर काम गरे । जुन टिम लिए पनि त्यसलाई बलियो बनाउनु पर्छ । मेरो प्रशिक्षक करियर समेत उमेर समुहको खेलाडी हेरेर भएको हो । यो मेरो कर्म हो । यसका लागि तयार छु ।’ मेघराजले थपे ।
उनले हरेक खेलमा राम्रो प्रर्दशन गर्दै नतिजा निकाल्ने योजना बनाएका छन् ।
‘राम्रो प्रदर्शन गरेर राम्रो नतिजा दिने कोशिस गर्नेछु । फुटबलमा दबाब लिने बानी छैन । हरेक खेलमा कमाउने बाहेक गुमाउने केहि हुन्न । यू–१९ टिमले देशको लागि र टिमको लागि पक्कै पनि केहि उपलब्धी लिएर आउछ ।’ उनले थपे ।
