काठमाडौं । नेपाल जुडो संघले ओलम्पियन फुपु ल्हामु खत्रीलाई सन् २०२० मा जापानमा हुने ओलम्पिक प्रतियोगिता सम्मका लागि प्रतिबन्ध लगाएको छ ।
ओलम्पिक तयारीका लागि जापानमा प्रशिक्षणरत फुपुले सम्बन्धित निकायलाई खबरनै नगरि स्वदेश फर्किएको भन्दै जुडो संघले टोकियो ओलम्पिक सम्मका लागि प्रतिबन्ध लगाएको हो ।
संघको पछिल्लो कारबाहीसंगै १२ औं साग गेम्सकी स्वर्णधारी फुपुले राष्ट्रिय र अन्तराष्ट्रिय प्रतियोगिता खेल्न नपाउने भएकी छिन् । सोही कारण उनी बाँकेमा सुरु भएको आठौं राष्ट्रिय राष्ट्रिय खेलकुदमा समेत सहभागिता जनाउन पाईनन् । उनी विभागीय टिम आर्मीबाट राष्ट्रिय प्रतियोगिता खेल्दै आएकी थिईन् ।
फुपूलाई गरिएको कारबाहीको पुष्टि गर्दै जुडो संघका सह महासचिव सुर्यनारायण श्रेष्ठले खेलपाटीसंग भने, ‘उनलाई अनुशासनको कारबाही गरिएको छ । उनलाई जापान ओलम्पिक सम्मका लागि कारबाही गरिएको छ । सोही अनुसारको पत्र विभागीय टिम आर्मीलाई समेत पठाईसकेका छौ ।’
नेपाल ओलम्पिक कमिटिको पहलमा टोकियो ओलम्पिकको तयारी स्वरुप फुपुलाई जापानमा प्रशिक्षणको व्यवस्था मिलाईएको थियो । तर प्रशिक्षणरत अवस्थामा उनीले जापान ओलम्पिक कमिटि, नेपाल ओलम्पिक कमिटि र नेपाल जुडो संघलाई थाहा नदिएर नेपाल फर्किएकी थिईन् ।
उनले जापानमा रहदाँ ८ महिनाको प्रशिक्षण गरेकी थिईन् । नेपाल फर्किए लगत्तै खेलपाटीसंग कुरा गर्दै फुपुले जापानमा बस्ने बातावरण नमिलेको र आफुलाई मानसिक तनाव दिने काम भएको बताउँदै नेपाल फर्किएको बताएकी थिईन् ।
संघका सह महासचिव श्रेष्ठले भने, ‘उनलाई निकै विश्वास गरेर उच्च स्तरको अभ्यासमा जापान पठाएका थियौ । तर केही दिन रोक्न गरेको आग्रहलाई बेवास्ता गर्दै उनी आफै टिकट लिएर स्वदेश फर्किईन् । सोही कारण उनलाई अनुशासनको कारबाही गरिएको छ ।’ उनले थपे, ‘फुपुको गतिविधिका कारण अन्य प्रतिभावान जुडो खेलाडीले अन्तराष्ट्रिय प्रशिक्षणको अवसर गुमाएका छन् ।’
१२ औ दक्षिण एसियाली खेलकुद सागमा नेपाललाई स्वर्ण दिलाएकी फुपुलाई ओलम्पिकको तयारी स्वरुप जापान प्रशिक्षणको व्यवस्था मिलाईएको थियो । फुपुको जापान प्रशिक्षणको रिपोर्ट हेरिसकेपछि संघले उनीमाथि कारबाही गरेको हो ।
फुपूकै कारण मनिता श्रेष्ठ लगायतका बैदेशिक प्रशिक्षण रोक्का भएपछि जुडो संघ र ओलम्पिक कमिटि फुपुसंग आक्रोसित हुदै आएको थियो ।
