विश्वविद्यालय खेलकुदमा त्रिभूवन विश्वविद्यालय च्याम्पियन

काठमाडौं । त्रिभूवन विश्वविद्यालयले तेस्रो प्रधानमन्त्री कप विश्वविद्यालय खेलकुदको उपाधि जितेको छ । शनिबार सम्पन्न प्रतियोगितामा  त्रिभुवन विश्वविद्यालयले ९ स्वर्ण, ४ रजत र २ कांस्य जित्दै टिम च्याम्पियन बनेको हो ।

राष्ट्रिय खेलकुद परिषद् (राखेप) द्वारा आयोजित प्रतियोगितामा काठमाडौं विश्वविद्यालय दोस्रो भयो । काठमाडौंले २ स्वर्ण, ४ रजत र ५ कांस्य हात पार्यो । २ रजत र ३ कांस्य जितेको सुदूरपश्चिमाञ्चलले तेस्रो स्थानमा चित्त बुझायो ।

प्रतियोगिता अन्तर्गत शनिबार भलिबलको पुरुष÷महिला दुवैमा त्रिभुवन विश्वविद्यालयले उपाधि जितेको छ । त्रिपुरेश्वरस्थित राखेपको कभर्डहलमा भएको पुरुष फाइनलमा टियुले सुदूरपश्चिमाञ्चललाई २३–२५, १६–२५, २५–२१, २५–२० र १६–१४ ले पराजित गर्यो ।

महिला फाइनलमा पनि टियुले सुदूरपश्चिमाञ्चललाई नै २५–२०, २७–२५ र २५–१७ को सोझो सेटमा हरायो । दुवैमा मध्यपश्चिमाञ्चल विश्वविद्यालय तेश्रो स्थानमा सीमित भयो ।

ब्याडमिन्टनमा समावेश चार स्पर्धामा टियुले सबैमा स्वर्ण हात पार्यो । पुरुष सिंगल्स फाइनलमा टीयूका जीवन आचार्यले टीयूकै पूर्णबहादुर थापालाई २१–१७ र २१–१८ को सोझो सेटमा पराजित गरे । महिला सिंगल्समा टीयूकी सीताकुमारी राईले टीयूकै तारा ओल मगरलाई २१–१४ र २१–६ को सीधा सेटमा हराइन् ।

पुरुष डबल्स फाइनलमा टियुका जीवन र पूर्णको जोडीले कृषि तथा वन विज्ञान विश्वविद्यालयका प्रशान्त भट्ट र लक्ष्मीनारायण ओझाको जोडीलाई २१–१५ र २१–११ को सोझो सेटमा पाखा लगाए । सो स्पर्धाको महिलामा टीयूका सीता र ताराको जोडीले स्वर्ण हात पारे ।

बुद्धिचालमा पनि टियुले १० अंक जोड्दै पहिलो स्थान कब्जा गर्यो । केयू दोश्रो तथा सुदूरपश्चिमाञ्चल तेश्रो भए ।

विजेताले २५ हजार, उपविजेताले १५ हजार र तेश्रो हुनेले १० हजार नगद पुरस्कार हात पारे । विजेतालाई राखेपका सदस्य–सचिव केशवकुमार विष्ट, सदस्य प्रा.डा. अरविन्द श्रीवास्तव र मध्यपश्चिमाञ्चल क्षेत्रीय खेलकुद विकास समितिका अध्यक्ष भीम ओलीले पुरस्कार प्रदान गरे ।

तीनदिने प्रतियोगितामा विभिन्न ८ विश्वविद्यालयबाट २ सय ५६ खेलाडी सहभागी थिए । भलिबल, ब्याडमिन्टन, बुद्धिचाल र टेबलटेनिसमा प्रतिस्पर्धा भएको थियो ।