सन्दीपको प्रदर्शनमा सुधार, मोन्ट्रेलको लगातार तेस्रो हार

काठमाडौं । नेपाली राष्ट्रिय टोलीका लेग स्पिनर सन्दीप लामिछाने रहेको टिम मोन्ट्रेल टाइगर्सले क्यानेडीयन लिग ग्लोबल टी-२० क्रिकेट लिगमा लगातार तेस्रो हार बेहोरेको छ ।

सोमबार राति भएको खेलमा भेनकोभर नाइट्ससंग १८ रनले पराजित हुँदै सन्दीपको टिम मोन्ट्रेलले लगातार तेस्रो हार बेहोरेको हो । भेनकोभरले दिएको १६७ रनको लक्ष्यसहित जवाफी ब्याटिङ गरेको मोन्ट्रेलले १९ ओभर ४ बलमा अलआउट हुँदै १४८ रन मात्र बनाउन सक्यो ।

मोन्ट्रेलका लागि जर्ज वर्करले ४३ तथा मोसिस हेन्रिकले ४० रन बनाएपनि जित निकाल्न सकेनन् । ब्याटिङतर्फ नेपालका सन्दीपले ३ बलमा १ छक्कासहित ७ रन जोडेर अविजित रहे ।  सन्दीपले वेष्ट इन्डिजका बलर आन्द्रे रसेललाई एक छक्का प्रहार गरेका थिए । मोन्ट्रेललाई सस्तैमा रोक्न भेनकोभरका टिम साउथी र साद बिन जफरले समान ३ – ३ विकेट लिए ।  

यसअघि टस हारेर पहिले ब्याटिङ गरेको भ्यानकुभरले पुरै २० ओभर खेल्दै ६ विकेट गुमाएर १६६ रन बनाएको थियो । भेनकोभरका भान डार डुसानले अविजित ८३ रन जोड्दा बाबर हायातले २० रन जोडे । मोन्ट्रेलका लाथिस मालिंगाले ३ विकेट लिए ।

दोस्रो खेलमा सन्दीपले आफ्नो बलिङ फिगरमा सुधार गरे । ४ ओभर बलिङ गरेका सन्दीपले १ मेडनसहित १९ रन खर्चदै १ विकेट लिए । जारी प्रतियोगितामा मेडन ओभर बलिङ गर्ने पहिलो खेलाडी समेत बनेका छन् सन्दीप । डेब्यु खेलमा सन्दीपले ४ ओभरमा ५७ रन खर्चदै मात्र १ विकेट लिएका थिए ।

यो लिगको लागि सन्दीप छैटौं चरणमा छानिएका थिए ।  भारतम सम्पन्न इन्डियन प्रिमियर लिग (आईपीएल) लिगमा दिल्ली डेयरडेभिल्सबाट खेलेका सन्दीप क्यानाडाको लिगपछि आगामी अगस्टमा क्यारेवियन प्रिमियर लिग (सीपीएल) खेल्नेछन् ।

ग्लोबल टी-२० क्रिकेट लिगमा सन्दीपको टोली पुछारमा रहेको छ । ३ खेल सकिदा मोन्ट्रेलले जित निकाल्न सकेको छैन । लिगमा विनिपिग हव्कस शीर्ष स्थानमा छ ।