स्पेनबाट खेल्ने प्रस्ताव पाएका थिए मेसीले

काठमाडौं। बाल्यकालमै आफ्नै देश अर्जेन्टिना छाडेर स्पेन पुगेका थिए, लिओनल मेसी र उनका परिवार।

स्पेनिस क्लब बार्सिलोनाको प्रसिद्ध एकेडेमी ‘ला मासिया’मा हुर्किएका मेसीले एक समय स्पेनका लागि खेल्ने अवसर पनि पाएका थिए। तर, उनले जन्मभूमि अर्जेन्टिनाकै प्रतिनिधित्व गर्ने इच्छा व्यक्त गरे।

१३ वर्षको उमेरमा उपचार र उज्ज्वल भविष्यको खोजीमा मेसी परिवारसहित स्पेन गएका थिए। बार्सिलोनाको युवा टोलीमा खेल्दै गर्दा उनको अद्भुत प्रतिभाले स्पेनिस फुटबल महासंघको ध्यान तानेको थियो। हालै ‘मिरो दे आत्रास’ नामक पोडकास्टमा दिएको अन्तर्वार्तामा मेसीले त्यतिबेला आफूलाई स्पेनको उमेरसमूह टोलीमा खेल्न आकर्षित गरिएको बताएका छन्।

मेसीले भने,‘म त्यतिबेला बार्सिलोनामा खेलिरहेको थिएँ। त्यसैले मलाई स्पेनका लागि खेल्ने संकेत गरिएको थियो। धेरै युवा खेलाडीका हकमा यस्तो हुन्छ, त्यसैले यो स्वाभाविक थियो।’

तर, अर्जेन्टिनी रहेका मेसीले तत्काल अन्तिम निर्णय लिन सकेनन्। यही द्विविधाका कारण उनले सन् २००३ को १७ वर्षमुनिको विश्वकपमा सहभागिता जनाउन सकेनन्।

उक्त प्रतियोगिताको सेमिफाइनलमा स्पेन र अर्जेन्टिना आमनेसामने भएका थिए। त्यस खेलमा मेसीका तत्कालीन सहकर्मी सेस फाब्रेगासले दुई गोल गर्दै अर्जेन्टिनालाई ३–२ ले पराजित गरेका थिए। उक्त कुरा स्मरण गर्दै मेसीले भने,‘फाब्रेगास त्यतिबेला आर्सनलमा खेलिरहेका थिए र हाम्रीविरुद्ध दुई गोल गरेका थिए। त्यसपछि सबैले मलाई किन स्पेनबाट नखेलेको भन्दै सोध्न थाले।’

स्पेनबाट खेल्दा सफलता पाउने सम्भावना धेरै भए पनि मेसीको लक्ष्य स्पष्ट थियो। बार्सिलोनामा प्रायः सबै उमेरसमूह पार गरे पनि उनको हृदय जन्मभूमि अर्जेन्टिनामै थियो।

उनले भने,‘अवसर थियो र सम्भव पनि थियो। तर, मेरो सधैंको चाहना अर्जेन्टिनाका लागि खेल्ने नै थियो।’ अन्ततः सन् २००४ मा अर्जेन्टिनाको २० वर्षमुनिको टोलीबाट मेसीले डेब्यु गरे। त्यसपछि २००५ को युवा विश्वकप उपाधि र २००८ को ओलम्पिक स्वर्ण पदकसँगै उनको सफल यात्राको सुरुआत भयो।