बाँके । आठौं वृहत राष्ट्रिय खेलकुदको औपचारिक उद्घाटन आज (बिहिबार) हुदैछ । राष्ट्रपति विद्यादेवी भण्डारीले पाँच नम्बर प्रदेशको नेपालगञ्ज रंगशालामा एक कार्यक्रमकाबीच प्रतियोगिताको औपचारिक उद्घाटन गर्दै हुनुहुन्छ ।
आयोजक राष्ट्रिय खेलकुद परिषद राखेपले साँझ ५ बजेर ३० मिनेटमा राष्ट्रपतिबाट प्रतियोगिताको भब्य उद्घाटन गरिने जनाएको छ ।
बैशाख ५ गते औपचारिक उद्घाटन भनिएपनि प्रतियोगिताको अधिकांश खेल २०७५ साल चैत २७ गतेबाट सुरु भईसकेका छन् ।
बैशाख ५ देखी ११ गते सम्म औपचारिक रुपमा सञ्चालन हुने प्रतियोगिताको समापन प्रधानमन्त्री केपी शर्मा ओलीले गर्ने कार्यक्रम निर्धारण गरिएको छ ।
प्रत्येक दुई बर्षमा आयोजना गर्ने लक्ष्य सहित बिसं २०३८ सालदेखि सुरु भएको राष्ट्रिय खेलकुद प्रतियोगिता सुरुका तीन संस्करण बाहेक कहिल्यै नियमित हुन सकेको थिएन । मुलुकभित्रका ठुला राजनीतिक परिवर्तन र प्रजातन्त्रको पुर्नस्थापनासंगै खेल क्षेत्रमा भित्रिएको राजनीतिकरणले प्रतियोगिताले गति लिन सकेको थिएन ।
बिसं २०४६ सालमा प्रजातन्त्र पुर्नस्थापनापछि पहिलो पटक राष्ट्रिय खेलकुद दुई बर्षको अन्तरमा सञ्चालन हुन लागेको हो । यसअघि २०७३ सालमा पुर्वाञ्चलको विराटनगरमा सातौ संस्करणको प्रतियोगिता आयोजना भएको थियो ।
‘आठौं राष्ट्रिय खेलकुद हाम्रै प्रदेशमा, पसिना र पौरख आफ्नै देशमा’ भन्ने मुल नाराका साथ चैत २७ गतेबाट सुरु भएको प्रतियोगिता प्रदेश ५ का बाँके, बर्दिया, दाङ, कपिलवस्तु, रुपन्देही र काठमाडौं, ललिलपुर, पोखराका खेल स्थलमा सञ्चालन भईरहेका छन् ।
राज्य पुर्नसंरचनापछि पहिलो पटक आयोजना भएको राष्ट्रिय खेलकुदमा सात प्रदेश सहित तीन विभागीय टिम र पहिलो पटक एनआरएनको टिमलाई समावेश गरिएको छ ।
प्रतियोगितामा खेलाडी, प्रशिक्षक, व्यवस्थापक, अफिसियल, रेफ्री, संघ, प्रतिनिधि गरेर करिब ११ हजारको सहभागिता रहने राखेपले जनाएको छ । प्रतियोगितामा झण्डै ५ हजार २ सय ११ जना खेलाडीले सहभागिता जनाउनेछन् । त्यसमा २ हजार ८ सय २५ पुरुष र २ हजार ३ सय ८६ महिला सहभागि छन् ।
सरकारले आठौं राष्ट्रिय खेलकुदलाई आसन्न १३ औ दक्षिण एसियाली खेलकुद सागको तयारीको रुपमा समेत लिएको छ । आठौंलाई लक्षित गर्दै सरकारले पाँच नम्बर प्रदेशमा झण्डै एक अर्वको खेलकुद पुर्वाधार निर्माणमा खर्च गरेको छ ।
नेपालमा पहिलो पटक अत्याधुनिक भीआईपी प्याराफिट सहितको नेपालगञ्ज रंगशालाको निर्माण गरिएको छ । सोही रंगशालामा प्रतियोगिताको औपचारिक उद्घाटन र समापन हुनेछ ।
-1755401924.jpg)
