अमर सिंह र कालिदासको जोडीलाई सफलता

ललितपुर । अमर सिंह राई र कालिदास राईको जोडीले मानभवन ब्याडमिन्टन क्लब अन्तर सदस्सीय ब्याडमिन्टन प्रतियोगितामा विजयी सुरुवात गरेका छन् ।

मानभवन नरपार्कस्थित ब्याडमिन्टन कोर्टमा शनिबार पुरुष युगलतर्फ अमर सिंह र कालिदासको जोडीले निरन प्रसाद राई र ज्योति प्रकाश पाण्डेको जोडीलाई पराजित गरे । दोस्रो चरणमा प्रवेश गर्ने क्रममा अमर सिंह र कालिदासको जोडीले निरन र ज्योतिको जोडीलाई २१-१४ र २३-२१ को सेटमा पराजित गरे ।

यस्तै उद्घाटन खेलमा लोकेन्द्र जेरो किराँती र बिक्रम महर्जनको जोडीले जित हात पारे । लोकेन्द्र र बिक्रमको जोडीले जय प्रसाद राई र सुर्य पोखरेलको जोडीलाई २१-१५ र २२-२० को सेटमा पराजित गरे ।

मानभवन ब्याडमिन्टन क्लबको आयोजनामा जारी प्रतियोगितामा पुरुष एकल र युगलको स्पर्धामा प्रतिस्पर्धा भईरहेको छ । प्रतियोगिता चैत २३ गतेसम्म संचालन हुने आयोजकले जनाएको छ ।

प्रतियोगिताको विजेताले नगदसहित ट्रफी, मेडल र प्रमाणपत्र प्राप्त गर्ने क्लबका सचिब लोकेन्द्र जेरो किराँतीले जानकारी गराए ।

प्रतियोगिताको उद्घाटन ललितपुर महानगरपालिकाका पाँच नम्बर वडाको सदस्य विकास मन श्रेष्ठले गरेका थिए । कार्यक्रममा राष्ट्रिय गीतका रचनाकार ब्याकुल माइला, नेपाल इन्भेष्टमेण्ट बैंकका सीईओ ज्योति प्रकाश पाण्डे लगायतका व्यक्तित्वहरुको उपस्थिति रहेको थियो ।