डर्टमण्डलाई हराउँदै टोटेनहम क्वार्टरफाईनलमा

एजेन्सी । ह्यारी केनको गोलको सहयोगमा प्रिमियर लिग क्लब टोटेनहम च्याम्पियन्स लिग फुटबलको क्वार्टरफाईनलमा प्रवेश गरेको छ । जर्मन क्लब बोरुसिया डर्टमण्डलाई अन्तिम १६ को दोस्रो लेगको खेलमा १–० ले हराउँदै टोटेनहम समग्रमा ४–० को नतिजा सहित अन्तिम ८ मा प्रवेश गर्न सफल रह्यो ।

टोटेनहमका लागि खेलको ४८ औ मिनेटमा केनले एक गोल गरेका थिए । मौसा सिसोकोको पासलाई सदुपयोग गर्दै ईङ्ल्याण्डका कप्तानले सहजै गोल गर्न सफल रहे ।
पहिलो लेगको खेल टोटेनहमले ३–० ले जितेको थियो ।

सन् २०११ पछाडी टोटेनहम पहिलो पटक च्याम्पियन्स लिग फुटबलको क्वार्टरफाईनल प्रवेश गर्न सफल भएको हो । च्याम्पियन्स लिगको क्वार्टरफाईनलको ‘ड्र’ मार्च १५ मा हुनेछ ।