ऋण अंकबाट बच्न सातदोबाटो र खुमलटार संघर्षरत

काठमाडौं । सहिद स्मारक 'बी' डिभिजन लिगमा आज (बुधबार) दुई खेल हुँदैछन् । दुबै खेल सातदोबाटोस्थित एन्फा टेक्निल सेन्टरमा हुनेछ । बुधबार हुने पहिलो खेलमा खुमलटार युवा क्लब र पुल्चोक स्पोर्टस क्लब भिड्नेछन् । मैदान उत्रदै गर्दा खुमलटार पहिलो जित निकाल्न चाहन्छ ।

उसले चौथो चरणको खेलसम्म आइपुग्दा अंक जोड्न सकेको छैन । पुल्चोक स्पोर्टस क्लब भने तेस्रो जित निकाल्ने दाउमा हुनेछ । तेस्रो जित निकाल्न सके पुल्चोक ९ अंकका साथ समुह बीमा दोस्रो स्थानमा पुग्नेछ । खेल दिउँसो साँढे १२ बजे सुरु हुनेछ ।

बुधबारनै हुने दोस्रो खेलमा सातदोबाटो युथ र रानीपोखरी कर्नर टिम आरसिटी भिड्दैछन् । खेल दिउँसो साँढे ३ बजे हुनेछ ।

सातदोबाटो पहिलो जितको खोजीमा छ । एक खेल बराबरी खेलेको सातदोबाटोको समुह ए मा १ अंक छ । आरसिटी भने दोस्रो जितका साथ दोस्रो स्थानका लागि संघर्ष गर्नेछ । आरसिटी एक जित दुई बराबरीका साथ समुह ए को तेस्रो स्थानमा छ ।

राउण्ड रोेबिन लिगका आधारमा खेलाइने प्रतियोगितामा दुई समुहका विजेता र उपविजेता दोस्रो चरणमा प्रवेश गर्नेछन् ।