मियामीको जितमा मेसीको २ गोल

काठमाडौं। लिओनल मेसीले दुई गोल गरेसँगै इन्टर मियामीले कोलोराडो र्यापिड्सलाई ३–२ ले हराउँदै सात खेलसम्मको अपराजित यात्रालाई लम्ब्याएको छ। यो अन्तरिम प्रशिक्षक गिलर्मो होयोसको नेतृत्वमा इन्टर मियामीको पहिलो जित पनि हो।

होयोस यसअघि क्लबका खेल निर्देशकका रूपमा कार्यरत थिए। जाभियर मास्चेरानोले व्यक्तिगत कारणले अप्रत्याशित रूपमा क्लब छोडेपछि उनले प्रशिक्षकको जिम्मेवारी सम्हालेका हुन्। मास्चेरानोले आफ्नो एकमात्र पूर्ण सिजनमै क्लबलाई २०२५ को एमएलएस कप उपाधि दिलाएका थिए।

मेसीले १३औं मिनेटमा पेनाल्टीमार्फत गोल गर्दै खेलको सुरुआत गरेका थिए। उनले ७९औं मिनेटमा निर्णायक गोल गरे। कोलोराडोको मिडफिल्ड नजिकैको गल्तीपछि उनले पेनाल्टी क्षेत्रको दायाँ कुनाबाट सुन्दर प्रहार गर्दै दुई डिफेन्डरबीचबाट बल जालीभित्र छिराए।

यो सिजन मेसीको सात गोल पुगेको छ। उनी साम सुरिज र पेटार मुसासँग संयुक्त रूपमा एमएलएसको सर्वाधिक गोलकर्ता बनेका छन्। मियामी (४–१–३) ले सिजनको पहिलो खेलमा लस एन्जलस एफसीसँग ३–० ले हार व्यहोरेपछि त्यसयता कुनै खेल हारेको छैन।

खेलको ८७औं मिनेटमा यानिक ब्राइटले सिधा रातो कार्ड पाएपछि मियामीले बाँकी समय १० खेलाडीमा खेल्नुपरेको थियो। कोलोराडो (४–४–०) ले पछिल्ला दुई खेल जितेको थियो र चारमध्ये तीन खेलमा सफलता हात पारेको थियो।

ब्राइटले जोश एटेन्सियोबाट पेनाल्टी जितेका थिए, जसलाई मेसीले गोलमा परिणत गरे। पहिलो हाफको अतिरिक्त समयमा माटेओ सिल्भेट्टीले दायाँ किनाराबाट क्रस दिएका थिए। यसमा बेर्टेरामेले हेडमार्फत गोल गर्दै मियामीलाई २–० को अग्रता दिलाए।

बेर्टेरामेले यसअघि न्यूयोर्क रेड बुल्सविरुद्ध २–२ को बराबरीमा आफ्नो पहिलो एमएलएस खेलमा गोल गरेका थिए। कोलोराडोका लागि राफाएल नाभारोले ५८औं मिनेटमा गोल फर्काए। उनले यसअघि ह्युस्टन डाइनामोविरुद्ध ६–२ को जितमा दुई गोल गरेका थिए र यो सिजन उनका ६ गोल भइसकेका छन्।

त्यसपछि डारेन यापी हमजात ओजेदिरानको स्थानमा मैदान छिरे र केही क्षणमै काउन्टर आक्रमणमा गोल गर्दै ६२औं मिनेटमा खेल २–२ को बराबरीमा ल्याए।