घनपोखरा ब्ल्यु र अरुण मेमोरियल फाइनलमा

हिमालयन मनोज, लमजुङ। घनपोखरा ब्ल्यु र अरुण मेमोरियल ४४औं नासरकों बजार घनपोखरा कप नाइन ‘ए’ साइड फुटबल प्रतियोगिताको फाइनलमा प्रवेश गरेका छन्।

श्री घनपोखरा युवा क्लब, मर्स्याङ्दी–१ को आयोजनामा लमजुङमा शनिबार सम्पन्न पहिलो सेमिफाइनलमा सडनडेथमा घनपोखरा ब्ल्युले लालीगुराँस युवा क्लबलाई ६–५ ले पराजित गर्दै उपाधि यात्रा तय गरेको हो।

निर्धारित समयमा दुबै टोलीले गोल गर्न नसक्दा खेल गोलरहित बराबरीमा टुंगिएको थियो। त्यसपछि सडनडेथमा पुगेको खेलमा घनपोखरा ब्ल्यु विजयी बन्न सफल भयो।

सडनडेथमा घनपोखरा ब्लुका मनोज गुरुङ, अर्जुन गुरुङ, अभिषेक विक, सूर्य विक, प्रबिन विक र बुद्धि विकले गोल गरे भने सुभाष गुरुङको प्रहार असफल रह्यो। यता, लालीगुराँसका सोमन् गुरुङ, धनीराज गुरुङ, गंगा गुरुङ, छादिन्द्र गुरुङ र रोहित गुरुङ गोल गर्न सफल भए। अश्विन गुरुङ र अर्जुन गुरुङले अवसर चुकाए।

दोस्रो सेमिफाइनलमा अरुण मेमोरियलले खासुरमाथि एकतर्फी प्रदर्शन गर्दै ६–० को फराकिलो जित हात पार्दै फाइनलमा स्थान बनाएको छ। अरुण मेमोरियलका सन्दीप गुरुङले ह्याट्रिक (३ गोल) गरेका थिए भने आशिक गुरुङ र उपेन गुरुङले समान १–१ गोल गरे। थप एक गोल आत्मघाती भयो।

अब प्रतियोगिताको उपाधिका लागि घनपोखरा ब्ल्यु र अरुण मेमोरियलबीच प्रतिस्पर्धा हुने भएको छ।

भेट्रानतर्फ बगुम र भीम्दाबेसी फाइनलमा

भेट्रानतर्फको पहिलो सेमिफाइनलमा बगुमले खासुरलाई १–० ले पराजित गर्दै फाइनलमा स्थान बनाएको छ। बगुमको जितमा किरण गुरुङको आत्मघाती निर्णायक बन्यो।

त्यसैगरी दोस्रो सेमिफाइनलमा भीम्दाबेसीले मकैडाँडालाई ४–० को फराकिलो अन्तरले हराउँदै फाइनल यात्रा तय गरेको छ। भीम्दाबेसीका सिजन श्रेष्ठले २ गोल गरेका थिए भने सन्तोष गुरुङ र दामर कुमार गुरुङले समान १–१ गोल थपेका थिए।

अब भेट्रानतर्फको उपाधिका लागि बगुम र बिम्दाबेसीबीच प्रतिस्पर्धा हुनेछ।