डराएका ग्वार्डिओला

काठमाडौं। पेप ग्वार्डिओलाका लागि कुरा एकदम स्पष्ट छ।

‘यदि हामी हार्यौं भने सबै समाप्त हुन्छ,’ म्यानचेस्टर सिटीका प्रशिक्षकले आइतबार हुने प्रिमियर लिग उपाधि भिडन्तबारे भने। सिटी ६ अंकले अगाडि रहेको आर्सनलसँग खेल्दैछ।

एक खेल कम खेलेको अवस्थामा ग्वार्डिओलाले अब आफ्ना खेलाडीहरूका लागि दोस्रो अवसर नरहेको स्वीकार गरे। यस सिजनभर सिटीले आर्सनललाई पछ्याउने भूमिका खेल्दै आइरहेको छ।

जनवरीको सुरुआतमा सन्डरल्यान्ड, चेल्सी र ब्राइटनसँग लगातार बराबरी खेलेपछि ग्वार्डिओलाले अवसर गुमाएको महसुस भएको बताए। मार्चको सुरुआतमा नटिङ्घम फरेस्ट र वेस्ट ह्यामसँग लगातार बराबरी खेलेपछि पनि उनलाई यस्तै अनुभूति भएको थियो।

‘हामीले भन्यौं अब त मौका गयो,’ उनले भने,‘तर, खेल सकिन्जेल केही पनि सकिँदैन र हामी अझै दौडमा छौं।’ यसमा सिटीको सुधारिएको प्रदर्शनसँगै आर्सनलको केही कमजोर प्रदर्शन पनि कारण बनेको छ।

मिकेल आर्टेटाको टोलीले पछिल्ला पाँचमध्ये तीन खेल हारेको छ। यद्यपि, तीमध्ये एक खेल लिगमा थियो बोर्नमाउथसँग। शनिबार घरेलु मैदानमा भएको खेलमा आर्सनलले २–१ को हार बेहोरेको थियो।

पछिल्ला तीन सिजन उपविजेता बनेको आर्सनलले सन् २००४ पछि पहिलोपटक इङ्लिस च्याम्पियन बन्ने प्रयास गरिरहेको छ। त्यतिबेला आर्सन वेङ्गरको प्रशिक्षणमा टोलीले पूरै सिजन अपराजित रहँदै उपाधि जितेको थियो।

‘हामी एउटा यस्तो पक्षसँग लडिरहेका छौं जुन धेरै महत्त्वपूर्ण छ। २२ वर्षदेखि आर्सनलले प्रिमियर लिग जितेको छैन,’ ग्वार्डिओलाले भने,‘यो कुरा परिवर्तन गर्न सकिँदैन र यसले आर्सनललाई अझ विशेष बनाउँछ।’

यस सिजन सिटी अहिले उत्कृष्ट लयमा देखिएको छ। टोलीले पछिल्ला तीन खेल जितेको छ। त्यसमा लिग कप फाइनलमा आर्सनलमाथि २–०, एफए कपमा लिभरपुलमाथि ४–० र लिगमा चेल्सीमाथि ३–० को जित समावेश छ।

ग्वार्डिओलाका अनुसार खेलाडीहरूमा आत्मविश्वास स्पष्ट देखिन्छ। ‘यदि आत्मविश्वास पसलमा किन्न पाइन्थ्यो भने हामी तुरुन्तै किन्थ्यौं,’ उनले भने,‘यो सबैभन्दा महत्त्वपूर्ण पक्षमध्ये एक हो र परिणामहरूले पनि हामीलाई मद्दत गरिरहेका छन्।’

अब प्रिमियर लिगमा ७ खेल बाँकी रहँदा यो निर्णायक चरणमा पुगेको उनले बताए।

दबाब होइन, अवसर

दबाबबारे सोध्दा आर्टेटाले भने,‘यो अवस्थामा हुनु नै ठूलो अवसर हो। म आफैंलाई धेरै भाग्यमानी महसुस गर्छु। यस्तो ठूलो खेल खेल्ने अवसर पाउनु विशेष कुरा हो।’

आर्सनलले इतिहाद मैदानमा पछिल्ला दुई लिग खेल बराबरी खेलेको छ र आर्टेटाले यसपटक जित्ने लक्ष्यसहित तयारी गरिरहेको बताए। ‘यो जितले सन्तुलन केही हदसम्म हाम्रो पक्षमा ल्याउन सक्छ,’ उनले भने, ‘तर, प्रिमियर लिगमा हरेक खेल जित्न निकै कठिन हुन्छ, त्यसैले अझै चुनौतीपूर्ण खेलहरू बाँकी छन्।’